މި ވަގުތު އޮތް ގޮތުން ރޭޑިއަންޓް ސްޕޯޓްސް ކުލަބަށް ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ މުބާރާތްތަކުގައި ބައިވެރިވެވޭނީ ނިއު ރޭޑިއަންޓް ސްޕޯޓްސް ކުލަބުގެ ދަރަނިތައް ދައްކައިގެންކަން ހާމަވެއްޖެއެވެ.
ފުޓްބޯޅައިގެ ހުރިހާ ހަރަކާތަކުން ނިއު ރޭޑިއަންޓް ސަސްޕެންޑް ކުރަން އެފްއޭއެމުން ނިންމާފައިވަނީ ކުޅުންތެރިންނަށް މުސާރަ ނުދޭ ކަމަށް ބުނެ 2019 ވަނަ އަހަރުގެ ޖެނުއަރީ މަހުގެ ތެރޭގައެވެ. އޭގެ ފަހުން ކުޅުންތެރިނަށް މުސާރަ ނުދޭ މައްސަލައިގައި ފީފާއިންވެސް ވަނީ ނިއު ރޭޑިއަންޓަށް ފިޔަވަޅު އަޅާފައެވެ. އެހެންކަމުން ފީފާއިން އަދަބު ދީފައިވާތީ އެފްއޭއެމުން ވަނީ މިދިޔަ ތިން އަހަރު އެ ކުލަބުގެ ސަސްޕެންޝަން ދަމަހައްޓަން ނިންމާފައެވެ. މި ނިންމުން އެފްއޭއެމުން ދެމެހެއްޓީ އެ އިދާރާގެ އަހަރީ ކޮންގްރެސްތަކުގައި ހުރިހާ ކުލަބެއްގެ މެދުގައި ނެގި ވޯޓުންނެވެ.
އެއާއެކު މިދިޔަ މާޗު މަހުގެ 10 ވަނަ ދުވަހު ނިއު ރޭޑިއަންޓުގެ ސަޕޯޓަރުން އިސްވެތިބެ ވަނީ ރޭޑިއަންޓް އުފައްދާފައެވެ. އެ ދުވަހު ސްޕޯޓްސް ކޮމިޝަނުގައި ރޭޑިއަންޓް ރަޖިސްޓްރީކުރިއިރު، އެ މަހުގެ 17 ވަނަ ދުވަހު ވަނީ އެ ކުލަބުގެ އިންތިޚާބު ބާއްވާފައެވެ. އޭގެ ފަހުން މި އަހަރުގެ ތިންވަނަ ޑިވިޝަނުގައި ވާދަކުރަން ރޭޑިއަންޓުން ސްކޮޑް އެކުލަވާލުމުގެ މަސައްކަތް ފެށިއިރު، އެ ކުލަބުން ވަނީ ކޯޗިން ޓީމާއި، ބައެއް ކުޅުންތެރިންނާއެކު އެއްބަސްވުމުގައި ސޮއިކޮށްފައެވެ.
އެފްއޭއެމުގެ އެސޯސިއޭޓް މެންބަރަކަށްވުމަށް ރޭޑިއަންޓުން ވަނީ ހުށަހަޅާފައިވަނީ މިދިޔަ މަހުގެ 28 ވަނަ ދުވަހެވެ. އެކަމަކު އޭއެފްސީން ބަލާ މިންގަނޑުތަކުން ރޭޑިއަންޓަކީ ނިއު ރޭޑިއަންޓުގެ "ސްޕޯޓިން ސަކްސެސާ" ކުލަބެއް ކަމުން، އެފްއޭއެމުގެ އެސޯސިއޭޓް މެންބަރުކަން ރޭޑިއަންޓަށް ދެވެން ނެތް ކަމަށް މި މަހުގެ 13 ވަނަ ދުވަހު އެ އިދާރާއިން ވަނީ ކަނޑައަޅާފައެވެ.
މިކަމާ ގުޅިގެން އަންގާރަ ދުވަހު ރޭޑިއަންޓުގެ އިސްވެރިންނާއި އެފްއޭއެމުގެ އިސްވެރިން ބައްދަލުވުމެއް ބޭއްވިއިރު، އެ ބައްދަލުވުމުގައި ހިނގާދިޔަ ކަންތައްތަކާ ގުޅިގެން އެ ބައްދަލުވުން ހުއްޓާލަން ޖެހުނެވެ. އެ ބައްދަލުވުމަށްފަހު ދައުރުވަމުން އަންނަ ޚަބަރުތަކުގެ ސަބަބުން މައްސަލަ އިތުރަށް ތަފުސީލުކޮށް އޮޅުން ފިލުވައިދޭން އެފްއޭއެމުން ވަނީ ބުދަ ދުވަހު ޒުވާނުންގެ މަރުކަޒުގެ ސެމިނާ ރޫމްގައި ނޫސްވެރިންގެ ބައްދަލުވުމެއް ބާއްވާފައެވެ.
މި ބައްދަލުވުމުގައި އެފްއޭއެމުގެ ޖެނެރަލް ސެކްރެޓަރީ ހުސެއިން ޖަވާޒް (ޖަވާ) ރޭޑިއަންޓް މައްސަލައިގެ ޓައިމްލައިނެއް ހިއްސާކުރިއިރު، މިދިޔަ މަހުގެ 15 ވަނަ ދުވަހު އޭއެފްސީން ރޭޑިއަންޓް "ފްލެގް" ކޮށްފައެވެ. ޖަވާ ވިދާޅުވީ ރޭޑިއަންޓަށް މިއަދު ދިމާވި މައްސަލައަކީ ނޭނގި ތިއްބާ ކުއްލިއަކަށް ދިމާވި މައްސަލައެއް ނޫން ކަމަށެވެ. އެގޮތުން ރޭޑިއަންޓްގެ އިންތިޚާބު ބޭއްވުމުގެ ކުރިންވެސް މިކަން މިހެން ވެދާނެކަން ސަމާލުކަމަށް ގެނެސް, ރޭޑިއަންޓުގެ ފައުންޑަރު އަދި މިހާރުގެ ޗެއާމަން އަޙްމަދު ވާސިފްއާވެސް އެކަންކަން ހިއްސާކުރަމުންދިޔަ ކަމަށް ވިދާޅުވިއެވެ.
"ރޭޑިއަންޓަކީ ނިއު ރޭޑިއަންޓުގެ ސްޕޯޓިން ސަކްސެސާ ކުލަބު"
އޭއެފްސީން އެފްއޭއެމަށް ފޮނުވާފައިވާ މެއިލްގައިވާ ގޮތުން ރޭޑިއަންޓުގެ ބޯޑާއި, ނަމާއި, ލޯގޯއާއި, ކުލަ ބަދަލުކުރިއަސް މި ވަގުތު އެ ކުލަބަށް ފުރުސަތެއް ނެތެވެ. ހަމައެކަނި އޮތް ފުރުސަތަކީ ނިއު ރޭޑިއަންޓުގެ ދަރަނި ދެއްކުންކަންވެސް އެ މެއިލްއިން ވަނީ ފާހަގަވެފައެވެ.
ނޫސްވެރިންގެ ބައްދަލުވުމުގައި އެފްއޭއެމުގެ ލީގަލް ހެޑް ޖައުޝަން ޝަރީފް ވިދާޅުވީ ރޭޑިއަންޓް މައްސަލައިގައި ސްޕޯޓިން ސަކްސެސާ ކަނޑައެޅުމުގައި ހޯދި ހޯދުމުގައި ފެނިފައިވަނީ ރޭޑިއަންޓްގެ ލޯގޯ އާއި ކުލަބުގެ ކުލަ އެއްގޮތް ކަންތައްތަކެއް ހުރިކަމެވެ. އަދި ރޭޑިއަންޓް ހިންގުމުގައި މަގާމުތަކަށް އިންތިޚަބުވެފައި ތިބި ފަރާތްތަކަކީ ނިއު ރޭޑިއަންޓުގެ އެންމެ ފަހުން އޮތް ބޯޑުގައިވެސް މަސްލަަހަތު އޮތް ފަރާތްތަކަކަށް ވުމުން، ރޭޑިއަންޓަކީ ނިއު ރޭޑިއަންޓްގެ ސްޕޯޓިން ސަކްސެސާ ގޮތުގައި ކަނޑައަޅަން އޭއެފްސީއަށް ޖެހުނީ ކަމަށްވެސް ޖައުޝަން ވިދާޅުވިއެވެ.
"ސްޕޯޓިން ސަކްސެސާއެއް މި އަންނަނީ ސަސްޕެންޑުވެފައި އޮތް، ނޫނީ ކުޅިވަރު ހަރަކާތްތަކުން މައްސަލަތަކެއްގެ ސަބަބުން އެކަހެރިކޮށްފައިވާ ޓީމެއްގެ ތެރެއިން، މިއީ ރަނގަޅަށް ހިނގަ ހިނގައި އޮންނަ ކުލަބެއްގެ ތެރެއިން އަންނަ ކަމެއް ނޫން.އެފްއޭއެމުގެ ލީގަލް ހެޑް ޖައުޝަން ޝަރީފް
ރޭޑިއަންޓުގެ ޗެއާމަނަކަށް ހުންނެވި ވާސިފް އާއި ހަޒާންދާރު ޒަހީނުއްދީން ސައީދަކީ އެންމެ ފަހުން އުވިދިޔަ، ނިއު ރޭޑިއަންޓުގެ ބޯޑުގައި ހިމެނޭ ފަރާތްތަކެވެ، އެހެންކަމުން އޭއެފްސީއަށް ރޭޑިއަންޓަކީ ނިއު ރޭޑިއަންޓްގެ ސްޕޯޓިން ސަކްސެސާ ކުލަބު ކަމަށް ބަލައިގަންނަން ފަސޭހަވި ކަމަށްވެސް ޖައުޝަން ވަނީ ވިދާޅުވެފައެވެ.
ރޭޑިއަންޓް މައްސަލައިގައި ކުރިއަށް ދެވޭނީ ކިހިނެއްތޯ ބެލުމަށް ބުދަ ދުވަހުގެ ހެދުނު އޭއެފްސީގެ އޮފިޝަލުންނާއެކު ފޯނު މެދުވެރިކޮށް އެފްއޭއެމުގެ އޮފިޝަލުން ވަނީ ބައްދަލުވުމެއް ބާއްވާފައެވެ. މި ބައްދަލުވުމުގައި ރޭޑިއަންޓުގެ ބޯޑުގައި ތިބި ނިއު ރޭޑިއަންޓާ ގުޅޭ މީހުން މަގާމުން ވަކިވެ، އެ ކުލަބުގެ ލޯގޯ އާއި ކުލަ ބަދަލުކޮށްފިނަމަ ފުރުސަތެއް އޮންނާނެތޯ ބެލި ނަމަވެސް، އެ ހިސާބުން ރޭޑިއަންޓަކީ ނިއު ރޭޑިއަންޓުގެ ސަކްސެސާ ކުލަބަށްވުމުގެ ހުރިހާ ޝަރުތެއް ފުރިހަމަވާން ބާރުލިބޭނެ ކަމަށް އޭއެފްސީން އަންގާފައިވާ ކަމަށް އެފްއޭއެމުގެ ޑެޕިއުޓީ ޖެނެރަލް ސެކްރެޓަރީ އަދި ކުލަބު ލައިސަންސިން ޑިޕާޓްމަންޓް ހިންގުމާ ހަވާލުވެ ހުންނެވި އަޙްމަދު ޝިބާއު (ޝިބާ) ވަނީ ވިދާޅުވެފައެވެ.
އެފްއޭއެމުގެ މުބާރާތްތަކުގައި ވާދަކުރުމަށް ރޭޑިއަންޓަށް ނިއު ރޭޑިއަންޓުގެ ދަރަނި ދައްކަން ޖެހޭއިރު، ކުޅުންތެރިންގެ މުސާރަ ދެއްކުމަށް ފީފާ ފުޓްބޯލް ފަންޑު މެދުވެރިކޮށް ނިއު ރޭޑިއަންޓަށް މީގެ ކުރިން ފުރުސަތެއް ފަހިވި ކަމަށް މައުލޫމާތު ލިބުނެވެ. އެކަމަކު ނިއު ރޭޑިއަންޓަކީ ބަނގުރޫޓުވެފައިވާކަން އިއުލާންކޮށްފައިވާ ކުލަބަކަށް ނުވެފައި، ފުޓްބޯޅައަށް އެނބުރި އައުމުގެ ފުރުސަތު ނިއު ރޭޑިއަންޓަށް އޮތުމުން، އެ ފަންޑު މެދުވެރިކޮށް މުސާރާތައް ދެއްކުމުގެ ޝަރުތު ނިއު ރޭޑިއަންޓަށް ހަމަނުވާ ކަމަށް އެފްއޭއެމުން ބުނެއެވެ.