ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙާއި އެމަނިކުފާނުގެ އަނބިކަނބަލުން ފަޒްނާ އަޙްމަދު ސިންގަޕޫރަށް ކުރެއްވި ނުރަސްމީ ދަތުރުފުޅު ނިންމަވާލެއްވުމަށްފަހު މިރޭ ރާއްޖެއަށް ވަޑައިގަންނަވައިފިއެވެ.
ރައީސުލްޖުމްހޫރިއްޔާ ދެކަނބަލުން ސިންގަޕޫރަށް ކުރައްވާ ނުރަސްމީ ދަތުރުފުޅެއްގައި ފުރާވަޑައިގަތީ މިމަހުގެ 14ވަނަ ދުވަހުއެވެ. އެހެންނަމަވެސް މި ދަތުރުފުޅުގެ ތަފްސީލެއް ރައީސް އޮފީހަކުން ހާމައެއް ނުކުރައްވައެވެ.
ރައީސްގެ ދެކަނަބަލުން، މިދިޔަ ފެބްރުއަރީ މަހުގެ 23ވަނަ ދުވަހުވެސް ސިންގަޕޫރަށް ވަޑައިގަތެވެ. އެފަހަރުގެ ދަތުރުފުޅަކީ ރައީސްގެ ތައިރޮއިޑްގެ ސާޖަރީއަކަށް ކުރެއްވި ދަތުރުފުޅކެވެ. ތައިރޮއިޑްގެ އޮޕަރޭޝަން ކުރެއްވީ ފެބްރުއަރީ 25 ވަނަ ދުވަހުއެވެ. 3 ގަޑިއިރަށް ކުރިޔަށް ދިޔަ ސާޖަރީއަށްފަހު ރައީސް ހޮސްޕިޓަލުން ދޫކޮށްލާފައިވަނީ އޭގެ ހަތަރު ދުވަސްފަހުންނެވެ. އަދި ފަރުވާއަށްފަހު އެނބުރި ރާއްޖޭ ވަޑައިގެންނެވީ މާރިޗު މަހު 06 ގައެވެ.
ފަރުވާއަށްފަހު ރާއްޖެ ވަޑައިގެން ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވަނީ ރަސްމީ ކަންތަކުގައި ބައިވެރިވެޑައިގެންފައެވެ. އަދި ބައެއް ރަސްމީ ދަތުފުޅުތަކުގައި ބައެއް ރަށްރަށަށްވެސް ވަޑައިގެންފައެވެ.
މި ދަތުރުފުޅުތަކުން ފުވައްމުލަކަށް ކުރެއްވި ދަތުރުފުޅުގައި އެރަށުގެ ރައްޔިންނާއި ބައްދަލުކުރައްވާ ވާހަކަފުޅު ދައްކަވަމުން، ތައިރޮއިޑް އޮޕަރޭޝަނަށް ފަހު 6 ނުވަތަ 7 ހަފްތާ ވަންދެން ވާހަކަ ނުދައްކަވަން ޑޮކްޓަރުން އިލްތިމާސްކޮށްފައިވާކަމަށް ވިދާޅުވެފައިވެއެވެ. އަދި ދަތުރަށްފަހު ރާޢްޖެ ވަޑައިގެން ފުރަތަމަ ފަހަރަށް ޤައުމާއި މުހާތަބުކުރައްވަމުން ރައީސް ވަނީ އެމަނިކުފާނުހެ ހާލުކޮޅު ރަނގަޅުކަމަށް ވިދާޅުވެފައެވެ. އަދި އެމަނިކުފާނަށް ހެޔޮ ދުއާކޮށްދެއްވި ހުރިހާ ފަރާތްތަކަށް އެމަނަިކުފާނު ވަނީ ޝުކުރު އަދާކުރައްވާފައެވެ.