އުތުރު ކޮރެޔާގެ ނިޔުކްލިޔަރ ހަތިޔާރުގެ ޤާބިލުކަން އިތުރުކުރަން އެ ޤައުމުން ޒަމާނީ އައު މިސައިލެއް ތަޖުރިބާކޮށްފިއެވެ.
އުތުރު ކޮރެޔާއިން ބުނެފައިވާ ގޮތުގައި އެ ޤައުމުން އެންމެފަހުން ތަޖުރިބާކޮށްފައިވަނީ ދުރު ރާސްތާގެ މިސައިލެއްކަމަށެވެ. އަދި އެއީ ނިޔުކްލިޔަރ ހަތިޔާރު އުފުލުމުގެ ޤާބިލުކަން ލިބިފައިވާ މިސައިލެއްކަމަށްވެސް އެ ޤައުމުންވަނީ ބުނެފައިވެއެވެ. އެ މިސައިލް ދަތުރުކުރި އުސްމިނާއި ދުވެލީގެ ސަބަބުން އެއީ ކުރު ރާސްތާގެ މިސައިލެއްކަމަށް އަސްކަރީ ތަޖުރިބާކާރުންވަނީ ބުނެފައެވެ.
އުތުރު ކޮރެޔާއިންވަނީ 2017ވަނަ އަހަރުގެ ތެރޭގައި އިންޓަކޮންޓިނެންޓަލް ބެލިސްޓިކް މިސައިލް، އައިސީބީއެމު ތަޖުރިބާކުރުން ހުއްޓާލައިފައެވެ. ނަމަވެސް އެ ޤައުމުންވަނީ އައިސީބީއެމު ތަޖުރިބާކުރުން އަލުން ފެށުމުގެ އިތުރުން ޒާމާނީ އައު އީޖާދުތައް އުފައްދައި ތަޖުރިބާކުރަން ފަށައިފައެވެ. އޭގެ ތެރޭގައި ރޭލެއް ބޭނުންކޮށްގެންވެސް ދާދިފަހުން އެ ޤައުމުންވަނީ މިސައިލެއް ތަޖުރިބާކޮށްފައެވެ.
އޭޕުރިލް މަހުގެ 5ވަނަ ދުވަހު އުތުރު ކޮރެޔާއިންވަނީ އެ ޤައުމާ ދެކޮޅަށް ޙަމަލާއެއްދީފިނަމަ ރައްދުގައި ނިޔުކްލިޔަރ ހަތިޔާރު ބޭނުންކުރާނެކަމުގެ އިންޒާރުދީފައެވެ.
އުތުރު ކޮރެޔާއިން ޒަމާނީ އައު ހަތިޔާރު ތަޖުރިބާކުރަމުންދާ ދަނޑިވަޅެއްގައި ދެކުނު ކޮރެޔާއިންވަނީ އެމެރިކާއާ ގުޅިގެން ނުވަ ދުވަހުގެ އަސްކަރީ ތަމުރީނުތަކެއް ފަށައިފައެވެ.