އިސްރާއީލުން އިސްތިޢުމާރުކޮށްފައިވާ ފަލަސްޠީނުގެ އިރުމަތީ ޤުދުސްގައި ހުންނަ މުސްލިމުންގެ ތިންވަނައަށް އެންމެ މުޤައްދަސް މިސްކިތްކަމަށްވާ މަސްޖިދުލް އަޤްޞާއަށް ޔަހޫދީ އިސްތިޢުމާރީ ފައުޖުތަކުން އަނެއްކާވެސް ވަދެގަނެއްޖެއެވެ.
އިސްރާއީލުގެ އިސްތިޢުމާރީ ފައުޖުތަކުން އަނެއްކާވެސް އަޤްޞާއަށް ވަދެގަނެފައިވަނީ ހަރުކަށި ފިކުރުގެ ޔަހޫދީން އަޅުކަންކުރުމަށް މިސްކިތުގެ ގޯތިތެރެއަށް ވަނުމަށް ފުރުޞަތު ދިނުމަށެވެ. މީގެ ކުރިންވެސް އެތައް ފަހަރެއްގެ މަތިން އިސްރާއީލުގެ އިސްތިޢުމާރީ ފައުޖުތަކުގެ ޙިމާޔަތުގައި ޔަހޫދީންވަނީ އަޤްޞާގެ ޙުރުމަތް ކަނޑައިފައެވެ.
ފަލަސްޠީނުގެ ރެޑު ކުރެސެންޓުން ބުނެފައިވާ ގޮތުގައި އަޤްޞާގައި ޔަހޫދީން ހިންގި އެންމެފަހުގެ ހަމަނުޖެހުންތަކުގައި ފަލަސްޠީނުގެ 19 މީހުން ޒަޚަމުވެފައިވާކަމަށެވެ. އޭގެ ތެރެއިން ތިން މީހަކާ ދެކޮޅަށް ރަބަރު ވަޒަން ބޭނުންކުރުމުގެ ސަބަބުން ލިބުނު އަނިޔާއަށް ފަރުވާދިނުމަށްވަނީ ހަސްފަތާލަށް ގެންގޮސްފައެވެ. އޭގެ އިތުރުން އިސްރާއީލުގެ އިސްތިޢުމާރީ ފައުޖުތަކުންވަނީ ފަލަސްޠީނުގެ ނުވަ މީހުން ހައްޔަރުކޮށްފައެވެ. ރައްދުގައި ފަލަސްޠީނުގެ ޢާއްމުންވަނީ ޔަހޫދީން ދަތުރުކުރަމުންދިޔަ ދެ ބަހަކަށް ގައު އުކައި ޙަމަލާދީފައެވެ. އެ ހަމަނުޖެހުންތަކުގައި ބައެއް ޔަހޫދީންނަށް އަނިޔާވިކަމަށްވެއެވެ.
މަސްޖިދުލް އަޤްޞާއަށް ވަދެ މިސްކިތުގެ ޙުރުމަތް ކަނޑައި މީހުންނަށް ބޮޑެތި އިނާމުތައް ހަރުކަށި ފިކުރުގެ ޔަހޫދީ ޖަމާޢަތްތަކުންވަނީ ހުށަހަޅައިފައެވެ. މީގެ ތިން ދުވަސްކުރިން އަޤްޞާއަށް ޔަހޫދީން ދިން ޙަމަލާތަކުގައި 150އަށްވުރެ ގިނަ މުސްލިމުން ޒަޚަމުވެފައިވެއެވެ. އަދި އިސްރާއީލުގެ އިސްތިޢުމާރީ ފައުޖުތަކުންވަނީ އަޤްޞާގެ ދިފާޢުގައި ނުކުތް 300އަށްވުރެ ގިނަ މީހުން ހައްޔަރުކޮށްފައެވެ.
ފަލަސްޠީނުގެ އިރުމަތީ ޤުދުސް ޔަހޫދީންގެ އިސްތިޢުމާރީ ވެރިކަމުގެ ދަށުގައި އޮތް ނަމަވެސް އެއީ އިސްރާއީލުގެ ބައެއްގެ ގޮތުގައި ބައިނަލްއަޤްވާމީ މުޖުތަމަޢުން ބަލައިގަނެފައެއް ނުވެއެވެ. މަސްޖިދުލް އަޤްޞާ ހުންނަ އިރުމަތީ ޤުދުސްސަކީ މުސްތަޤްބަލުގައި ޤާއިމުކުރާ ފަލަސްޠީނުގެ މިނިވަން ދަޢުލަތުގެ ވެރިރަށްކަމަށް ބައިނަލްއަޤްވާމީ މުޖުތަމަޢުންވަނީ ބަލައިގަނެފައެވެ. ނަމަވެސް އިރުމަތީ ޤުދުސް އިސްތިޢުމާރުކުރި ގޮތަށް އަޤްޞާ ހުންނަ ސަރަޙައްދުވެސް އިސްރާއީލުގެ ބައެއްގެ ގޮތުގައި ޔަހޫދީން ކަނޑައެޅުމުގެ ބިރުވަނީ ހީވެފައެވެ.