ބްލޮގަރ ޔާމީން ރަޝީދުގެ މަރުގެ މައްސަލާގައި ކުށް ސާބިތު ނުވި 4 މީހުންގެ މައްސަލަ ޕްރޮސެކިއުޓަރ ޖެނެރަލްގެ އޮފީހުން އިސްތިއުނާފްކޮށްފިއެވެ.
ޔާމީން ރަޝީދު މަރާލި މައްސަލައިގައި ހ. އަންނާރުމާގެ، އިސްމާޢީލް ހައިޝަމް ރަޝީދުއާއި، މ. އިރާސްމިކް، އަޙްމަދު ޒިހާންގެ މައްޗަށް ތޫނު އެއްޗެއް ބޭނުންކޮށްގެން ޤަޞްދުގައި މީހަކު މެރުމުގެ ކުށުގެ ދަޢުވާ ސާބިތުވާކަމަށް ކްރިމިނަލް ކޯޓުން ވަނީ މިދިޔަ ޖެނުއަރީމަހުގެ ތެރޭގައިހުކުމް ކޮށްފައެވެ.
މި މައްސަލައިގައި އިތުރު ބައެއްގެ މައްޗަށްވެސް ބިރުދެއްކުމާއި ނުރައްކާތެރި ހަތިޔާރާއި ތޫނު އެއްޗެހި ގެންގުޅުން މަނާކުރުމުގެ ޤާނޫނުގެ ދަށުން، ތޫނު އެއްޗެއް ބޭނުންކޮށްގެން ޤަޞްދުގައި މީހަކު މެރުމުގެ ކުށުގެ ދަޢުވާ ކޮށްފައިވެއެވެ. އެއީ ގދ. ގައްދޫ، ސިންދުބާދުގެ، މުޙައްމަދު ދިފްރާންއާއި، މ. ކުދެހިގެ، ޙަސަން ޝިފާޒުއާއި، މ. ޠާއިފް، އިސްމާޢީލް ރަޝީދުއާއި، މ. ކޮޅުފުށި، އީސްޓް، ޙުސައިން ޒިޔާދެވެ. ނަމަވެސް އެ މީހުންގެ މައްޗަށް ކުށް ސާބިތުވެފައެއް ނުވެއެވެ.
ޕީޖީ އޮފީހުގެ ޕަބްލިކް ޕްރޮސެކިއުޓަރ އަދި މީޑިއާ އޮފިޝަލް އަހުމަދު ޝަފީއު ވިދާޅުވީ ކުށް ސާބިތުނުވާކަމަށް ކަނޑައެޅި މީހުންގެ ތެރެއިން ގދ. ގައްދޫ, ސިންދުބާދުގެ, މުޙައްމަދު ދިފްރާންއާއި, ކ. މާލެ, މ. ޠާއިފް, އިސްމާޢީލް ރަޝީދުގެ މައްޗަށް އުފުލި ތޫނު އެއްޗެއް ބޭނުންކޮށްގެން ޤަޞްދުގައި މީހަކު މެރުމުގެ ކުށުގެ ދަޢުވާ ސާބިތުނުވާކަމަށް އެކޯޓުން ނިންމެވި ނިންމެވުން ދިވެހިރާއްޖޭގެ ހައި ކޯޓުގައި މިއަދު އިސްތިއުނާފު ކޮށްފައިވާކަމަށެވެ. ނަމަވެސް މިމައްސަލައިން ދެން ސަލާމަތްވި މ. ކުދެހިގެ، ޙަސަން ޝިފާޒުއާއި، މ. ކޮޅުފުށި، އީސްޓް، ޙުސައިން ޒިޔާދުގެ މައްސަލަ އިސްތިއުނާފްކޮށްފައެއް ނުވެއެވެ.
ބްލޮގަރ ޔާމީން ރަޝީދު މަރާލާފައިވަނީ 2017 ވަނަ އަހަރުގެ އޭޕްރީލްމަހުގެ 23 ވަނަ ދުވަހުގެރޭ ދަންވަރު އޭނާ ދިރިއުޅުނު މ.ސްޕެޓިއުލާގޭގެ ސިޑިގޮޅި ކައިރީގައި ތޫނު އެއްޗަކުން ހަމަލާދީގެންނެވެ.