ހުޅުމާލޭގައި ހިންގާ ހާންޖީ ރެސްޓޯރެންޓްގައި މީހަކަށް ހަމަލާދީ މަރާލިކަމުގެ ތިހުމަތުގައި ހޯދަމުންދިޔަ ޕާކިސްތާނު މީހާ އަތުލައިގެންފިއެވެ.
ފުލުހުން ބުނީ މި މައްސަލާގައި ފިލައިގެން އުޅެނިކޮށް ހައްޔަރުކޮށްފައިވަނީ ޕާކިސްތާނު ރައްޔިތެއްކަމަށްވާ އުމުރުން 26 އަހަރުގެ މުހައްމަދު އާބިދުއެވެ. އެހެންނަމަވެސް މީނާ ހައްޔަރުކުރީ ކޮންތާކުންކަމެއް ފުލުހުން ހާމައެއް ނުކުރެއެވެ.
ހުޅުމާލޭ ނިރޮޅުމަގުގެ 19 ވަނަ ގޯޅީގައި ހުންނަ ހާޖީ ރެސްޓޯރެންޓް ތެރޭ ރޭ އިރާކޮޅު ހިނގި މި ހާދިސާގައި ވަޅިޔަކުން ހަމަލާދިނުމުގެ ސަބަބުން މަރުވެފައިވަނީ އެ ތަނުގައި މަސައްކަތް ކުރާ ބަންގްލަދޭޝް ރައްޔިތެކެވެ. އޭނާ މަރުވީ ފަރުވާއަށް ހުޅުމާލޭ ހޮސްޕިޓަލަށް ގެންދިޔަތާ ކުޑައިރުކޮޅެއްގެ ތެރޭގައިކަމަށް އެ ހޮސްޕިޓަލުން ވިދާޅުވިއެވެ.
މި މައްސަލާގައި ހައްޔަރުކި ޕާކިސްތާނު މީހަކީ އެ ރެސްޓޯރަންޓްގެ ކައްކާއެވެ. ރެސްޓޯރަންޓް ތެރޭގައި ހިނގި ދެ ބަސްވުމެއްގެ ޕާކިސްތާނު ކައްކާ ބަންގްލަދޭޝް މީހާ ހަށިގަނޑުގެ ތިން ތަނަކަށް ވަޅިން ހަމަލާދީފައިވާކަމަށް މަންޒަރުދުށް ބައެއް މީހުން ވަނީ ބުނެފައެވެ. އަދި މި ދެމީހުންގެ މެދުގައި މީގެކުރިންވެސް ބައެއް ދެބަސްވުންތައް ހިނގާފައިވާކަމަށް އެތަނުގައި މަސައްކަތް ކުރާ ބައެއް މީހުން ވަނީ ބުނެފައެވެ.
ފިލައިގެން އުޅުނު ޕާކިސްތާނު މީހާ ހައްޔަރުކުރުމަށް ފަހު ފުލުހުން ވިދާޅުވީ މިމީހާގެ މައްސަލަ ސީރިއަށް މައްސަލައެއްގެ ގޮތުގައި ބަލަމުން އަންނަކަމަށެވެ.
ރޭ ހިނގި މިހާދިސާގައި މަރުވި ބަންގްލަދޭޝް މީހާ ރެސްޓޯރަންޓް ތެރެއަށް ވެއްޓިފައި އޮންނަ ވީޑިއޯއެއް ވަނީ އާއްމުވެފައެވެ. މި ވީޑިއޯއިން ފެންނަގޮތުގައި އެމީހާ ލައިގެން އޮތް ޓީޝާޓް އޮތީ ލެއިން ފޯވެފައެވެ. އަދި އެމީހާގެ ފުރާނަ ސަލާމަތްކުރުމަށް އެހެން މީހަކު ސީޕީއާރު ދޭތަންވެސް މި ވީޑިއޯއިން ފެނެއެވެ.