މަސްވެރިކަން ރަނގަޅުވެ، ބާޒާރުގައި ވަޅޯމަހުގެ އުފެއްދުންތަކުގެ އަގު ދަށަށް ހިނގައްޖެއެވެ.
މިއަދު ވަޅޯމަސް މާރުކޭޓުގައި ވެކިއުމްމަސް ކިލޯއެއްގެ އަގު ހުރީ 80ރ އާއި 90ރ އާއި ދެމެދުގެ އަގުތަކެއްގައެވެ. ރޯދަމަސް ފެށުނު އިރު ވެކިއުމް މަހުގެ އަގު ހުރީ، ކިލޯއެއް 100ރ އާއި 120ރ އާއި ދެމެދުގެ އަގުތަކެއްގައެވެ.
މާރުކޭޓުގައި ތަކެތި ވިއްކާ ފަރާތްތަކުން ބުނީ އަގުތައް ދަށަށް ގޮސްފައިވަނީ މި ދުވަސްކޮޅު ރަށްރަށުން ބާޒާރަށް ގިނަ އަދަދަކަށް މަހުގެ އުފެއްދުންތައް ލިބެމުންދާތީ ކަމަށެވެ. ބާޒާރުގައި ވަޅޯ މަހުގެ އަގުވެސް ވަނީ ހެޔޮ ވެފައެވެ. އެގޮތުން ވަޅޯމަސް ގަނޑެއް 10ރ އިން ފެށިގެން 70ރ އާއި ދެމެދުގެ އަގުތަކެއްގައި ލިބެން އެބަހުއްޓެވެ. ވިޔަފާރިވެރިން ލަފާ ކުރާގޮތުގައި ރޯދަމަހުގެ ކުރިއަށް އޮތް ދުވަސްތަކުގައިވެސް މަހުގެ އުފެއްދުންތަކުގެ އަގުތައް އުފުލިގެނެއް ނުދާނެއެވެ.
ވަޅޯ މަސް މާރުކެޓުގައި ތަކެތި ވިއްކާ ފަރާތްތަކުން ބުނީ ރޯދަމަސް ފެށުނު އިރު ވިޔަފާރި ވަރަށް ރަނގަޅުވި ނަމަވެސް މި ދުވަސްކޮޅު ވިޔަފާރި ވަނީ ދަށްވެފައެވެ.