ގދ. ތިނަދޫގައި ތަރައްޤީކުރާ ސަރަހައްދީ ވިޔަފާރި ބަނދަރުން އަންނަ އަހަރު ކުރީކޮޅު ޚިދުމަތްދޭން ފެށޭނެ ކަމަށް އެމްޕީއެލްގެ ސީއީއޯ ޝާހިދު އަލީ ވިދާޅުވެއްޖެއެވެ.
ގދ.ތިނަދޫ ސަރަޙައްދީ ބަނދަރު ބެލެހެއްޓުން ހަވާލުކުރުމަށް ސަރުކާރުން ނިންމާފައިވަނީ މޯލްޑިވްސް ޕޯޓްސް ލިމިޓެޑް އެމްޕީއެލްއާއެވެ. ބޭރުން އަންނަ ބޯޓުފަހަރަށް ސީދާ ޚިދުމަތް ދެވޭ ފެންވަރުގެ ސަރަޙައްދީ ބަނދަރެއް ހުވަދޫގައި ތަރައްޤީކުރުމުގެ މަސައްކަތް ސަރުކާރުން ފެށީ 2020ވަނަ އަހަރުގެ ޑިސެމްބަރުމަހުއެވެ.
ޕީއެސްއެމް ނިއުސްގެ ރާއްޖެ މިއަދު ޕްރޮގްރާމުގައި ވާހަކަދައްކަވަމުން އެމްޕީއެލްގެ ސީއީއޯ ޝާހިދު އަލީ ވިދާޅުވީ އެތަނުގެ މަސައްކަތް ބާރު ދުވެއްޔެއްގައި ކުރިއަށްދާ ކަމަށެވެ. އެގޮތުން ޕޯޓުގެ ޔާޑު މަސައްކަތާއި، ފެންސިންގއާއި، ޕޭވްމަންޓުގެ މަސައްކަތް މިހާރު ނިމިފައިވާ ކަމަށާއި، އަދި މިހާރު ކުރިއަށްދާ މަސައްކަތްތައް ނިމުނުހާ އަވަހަކަށް އެ ޕޯޓުން ޚިދުމަތްދޭން ފަށާނެ ކަމަށް ޝާހިދު ވިދާޅުވިއެވެ.
" މިހާރު އެމްޓީސީސީ އާއި ހަވާލުކުރެވިގެން ކުރިއަށް މިގެންދަނީ އެޑްމިން ބިލްޑިންގާއި، ވެއާ ހައުސްއާއި، ސެކިއުރިޓީ ބިލްޑިންގެ މަސައްކަތް، އެ މަސައްކަތް މި ބަލަނީ އަންނަ އަހަރު ކުރީކޮޅު ހިސާބަށް ނިމޭނެ ކަމަށް އެ މަސައްކަތް ނިމޭހާ އަވަހަކަށް އެ ޕޯޓުގެ ޚިދުމަތްތައްވެސް ފަށައިގަންނާނަން،" ޝާހިދު ވިދާޅުވިއެވެ.
ސަރުކާރުން ގދ.ތިނަދޫގައި ޕޯޓް ތަރައްޤީކުރަން ނިންމީ އެ ސަރަޙައްދަށް އިޤްތީސާދީ އިތުރު ފުރުޞަތުތައް ގެނެސް، ވިޔަފާރީގެ އިތުރު ދޮރުތައް ހުޅުވައިދިނުމަށެވެ. އެގޮތުން ބޭރުން މުދާ ސީދާ ތިނަދުއަށް ގެނެވޭނެ މަގު ތަނަވަސް ވެގެން ދިޔުމުން އެ ސަރަޙައްދުގެ ވިޔަފާރިތަކަށް ގިނަ ކުރިއެރުންތަކެއް ލިބިގެންދާނެ ކަމަށް ސަރުކާރުން ދެކެއެވެ.
ސަރަޙައްދީ ބަނދަރުތައް ތަރައްޤީކުރުމުގެ މަސައްކަތުގެ ދަށުން އައްޑޫ ހިތަދޫ ޕޯޓާއި ކުޅުދުއްފުށީ ޕޯޓު އިތުރަށް ތަރައްޤީކުރުމުގެ މަސައްކަތްވެސް އެމްޓީސީސީއާ ވަނީ ހަވާލުކޮށްފައެވެ. ޝާހިދު ވިދާޅުވީ ކުޅުދުއްފުށީ ޕޯޓަށްވެސް ގިނަ ބަދަލުތަކެއް ގެންނަން ޖެހޭ ކަމަށެވެ. އެގޮތުން ބޮޑު ބޯޓުތައް ކައިރި ކުރުމަށް ކީވޯލްއެއް އިތުރުކުރަން ޖެހޭ ކަމަށް ޝާހިދު ވިދާޅުވިއެވެ.
"ކުޅުއްދުފުށީ ޕޯޓު ތަރައްޤީކުރަން ބޭނުންވާ ގޮތުގެ މާސްޓަރ ޕްލޭނެއް ހެދި އެ މާސްޓަރ ޕްލޭނާ އެއްގޮތަށް އީއައިއޭ ހެދުމުގެ މަސައްކަތް ކުރިއަށް އެބަދޭ، އެމްޓީސީސީ އާއި އެއްކޮށް މަޝްވަރާކުރެވިގެން، އެމްޓީސީސީ އާއި ހަވާލުކޮށްފައިވަނީ އީއައިއޭ ޕްރޮސެސް އާއި ޑީޓެއިލް ޑިޒައިންގެ މަސައްކަތް،" ޝާހިދު ވިދާޅުވިއެވެ.
ޝާހިދު ވިދާޅުވީ ހިތަދޫ ޕޯޓަށްވެސް ބޮޑު ބަދަލެއް ގެންނަން ޖެހޭ ކަމަށެވެ. އެގޮތުން އެ ޕޯޓުގެ މަސައްކަތްތައް ފެށުމަށް އެމްޓީސީސީއާއެކު އެއްބަސްވުމެއްގައި ސޮއިކޮށްފައިވާ ކަމަށްވެސް ޝާހިދު ވިދާޅުވިއެވެ.