ސުރީ ލަންކާއަށް ކުރިމަތިވެފައިވާ ނާޒުކު އިޤްތިޞާދީ ޙާލަތުގެ ސަބަބުން ސަރުކާރާ ދެކޮޅަށް ކުރަމުންދާ ބޮޑެތި މުޒާހަރާތައް ހުއްޓާލައި މަޝްވަރާގެ މޭޒަށް އައުމަށް އެ ޤައުމުގެ ބޮޑުވަޒީރު މަހިންދަ ރާޖަޕަކްސަ ގޮވާލައްވައިފިއެވެ.
ސުރީ ލަންކާގެ އިދިކޮޅު ޕާޓީތަކުން މަހިންދައާ ދެކޮޅަށް އިތުބާރުނެތްކަމުގެ ވޯޓެއް ނެގުމަށް ތައްޔާރުވަމުންދާ ދަނޑިވަޅެއްގައި އޭނާގެ ރަސްމީ އިދާރާއިން ނެރުނު ބަޔާނެއްގައި ބުނެފައިވަނީ އޭނާ ހުންނެވީ މުޒާހަރާތައް ކުރަމުންދާ ޢާއްމުންނާ ބައްދަލުކުރައްވައި މަޝްވަރާކުރެއްވުމަށް ތައްޔާރަށްކަމަަށެވެ. މީގެ ކުރިން އޭނާވަނީ މުޒާހަރާތަކުގެ ސަބަބުން އެ ޤައުމުގެ އިޤްތިޞާދީ ޙާލަތު ޙައްލުކުރުމަށް ކުރަމުންދާ މަސައްކަތްތަކަށް ބޮޑެތި ހުރަސްތަކެއް އެޅޭކަމަށާއި ބޮޑެތި މާލީ ގެއްލުންތަކެއް އެ ޤައުމަށް ލިބެމުންދާކަމަށެވެ. ނަމަވެސް މުޒާހަރާ ކުރަމުންދާ ޢާއްމުން ބުނެފައިވަނީ އެ ޤައުމުގެ އެކި ސަރަޙައްދުތަކުގައި ކުރަމުންދާ މުޒާހަރާތައް ހުއްޓާލާނީ މަހިންދައާއި އޭނާގެ ކޮއްކޯފުޅު އަދި ސުރީ ލަންކާގެ ރައީސް ގޮތަބަޔާ ރާޖަޕަކްސަ އިސްތިޢުފާދެއްވުމުންކަމަށެވެ.
ސުރީ ލަންކާގެ އިދިކޮޅު ފަރާތްތަކުން ބުނެފައިވަނީ މަހިންދައާ ދެކޮޅަށް އިތުބާރުނެތްކަމުގެ ވޯޓެއް ނެގުމަށް ތައްޔާރުވަމުންދާ އޭނާ އިސްތިޢުފާދެއްވުމަށް ހަފުތާއެއްގެ މުޙުލަތެއް ދީފައިވާނެކަމަށެވެ. އަދި ސުރީ ލަންކާގައި ހަމަޖެހުން ޤާއިމުކުރުމަށް މަހިންދައާއި ގޮތަބަޔާ އިސްތިޢުފާދެއްވަން ޖެހިވަޑައިގަންނަވާކަމަށާއި އެ ޤައުމަށް ބޭރުގެ އެހީތެރިކަން ލިބޭނީ ހަމަޖެހުން ޤާއިމުކުރެވިގެންކަމަށްވެސް އެ ޕާޓީތަކުން ބުނެފައިވެއެވެ. ފާއިތުވި ދުވަސްތަކުގައި ސުރީ ލަންކާގެ ވެރިކަންކުރާ އިއްތިޙާދަށް ނިޞްބަތްވާ ޤާނޫނުހަދާ މަޖިލީހުގެ 41 މެންބަރުންވަނީ އިދިކޮޅު ޕާޓީތަކާ ގުޅިފައެވެ. ނަމަވެސް 225 މެންބަރުންގެ މައްޗަށް އެކުލެވޭ އެ ޤައުމުގެ ޤާނޫނުހަދާ މަޖިލީހުގެ އަޣްލަބިއްޔަތު ނުގެއްލޭކަމަށް އެ ޤައުމުގެ ސަރުކާރުންވަނީ ބުނެފައެވެ.