ޑްރައިވިން ސްކޫލުގައި ވަކި ގަޑިއެއް ހަމަކުރުމުން ލައިސަންސް ދޫކުރާގޮތަށް އޮތް އުސޫލު އުވާލައިފިއެވެ.
ޑްރައިވިންގ ސްކޫލް ހިންގުމާއި އިންސްޓްރަކްޓަރުންގެ ގޮތުގައި ހަރަކާތްތެރިވުމުގެ ޤަވާއިދަށް މިއަހަރުގެ ޖެނުއަރީ މަހު ގެނައި ބަދަލުގައިވަނީ، ލައިސަންސް ދޫކުރަން ޓެސްޓު ހެދޭނީ ޑްރައިވިންގް ސްކޫލް މެދުވެރިކޮށް ވަކި ވަގުތެއް ހަމަވަންދެން ޓްރެއިން ވެގެންކަމަށެވެ. އެގޮތުން ސައިކަލް ނަމަ 40 ގަޑިއިރު ދުއްވަން ދަސްކުރަން ޖެހެއެވެ. އަދި ކާރާއި ޕިކަޕު ފަދަ އުޅަނދު ދުއްވުމަށް ލައިސަންސް ނެގޭނީ 30 ގަޑިއިރު ހަމަކުރުމަށްފަހުގައި ކަމަށް ބުނެފައިވެއެވެ.
މިއީ ރައްޔިތުން ވަރަށް ބޮޑަށް ކަންބޮޑުވުން ފާޅުކުރިކަމެކެވެ. އެއްގަމު އުޅަނދު ދުއްވުމުގެ ލައިސަންސް ނަގަންދާ ގިނަ ބަޔަކީ، އަމިއްލައަށް ނުވަތަ ޑްރައިވިން ސްކޫލްގެ އެހީއަކާ ނުލައި ދަސްކުރާ މީހުންނެވެ. އޭރު ގެނައި މިބަދަލާއެކު ކުރިން ބޮޑު ފީ ދައްކައިގެން ޑްރައިވިން ސްކޫލަށް ދިއުން ނޫން ގޮތެއް ނެތެވެ.
އުސޫލަށް ބަދަލުގެނެސް، މިހާރު ގެޒެޓްކޮށްފައިވާ ޤަވާއިދުގައި ވަނީ މިބައި މުޅިން އުނިކޮށްފައެވެ. އަދި ގެޒެޓް ކުރުމަށްފަހު މި އުސޫލަށް މިހާރުވަނީ ޢަަމަލު ކުރަން ފަށާފައެވެ.
އެއްގަމު އުޅަނދު ދުއްވަން ދަސްކޮށްދޭ އިންސްޓްރަކްޓަރުންނަށް ވެވެނީ މި ގަވާއިދުގެ ދަށުން ވަކި ޝަރުތުތަކަކާއެކުއެވެ.
އެގޮތުން ޑްރައިވިންގް އިންސްޓްރަކްޓަރުންނަށް ދޭ 6 ގަޑިއިރުގެ ތަމްރީނެއް ފުރިހަމަކުރަންޖެހެއެވެ. މިތަމްރީންގައި އިންސްޓްރަކްޓަރުންނަށް ތިއަރީ އަދި ޕްރެކްޓިކަލް ޓެސްޓެއްވެސް ދޭނެއެވެ. އިންސްޓްރަކްޓަރުންގެ ލައިސަންސް ދޫކުރަނީ އުމުރުން 18 އަހަރާއި 60 އަހަރާއި ދެމެދުގެ މީހުންނަށެވެ.
މި ގަވާއިދަށް އަމަލުކުރާނީ 2 މަސް ދުވަހަށް ފަހު ކަމަށް އުސޫލުގައި ވަނީ ބުނެފައެވެ.
މާލެ ސަރަޙައްދުގައި ޑްރައިވިން ޓެސްޓު ހެދޭނެ ފަސޭހަ އިންތިޒާމެއްވެސް މިހާރުވަނީ ހަމަޖައްސާފައެވެ. އެގޮތުން ހުޅުމާލޭގައި ޑްރައިވިން ޓްރެކެއް ހަދާ، ލައިސަންސް ނަގާ މީހުންގެ ޓެސްޓު މިހާރު ހަދަނީ އެ ޓްރެކްގައެވެ.