ސައުތް އޭޝިއަންގޭމްސްގައި ބައިވެރިވުމަށް އަންހެން ހޭންޑްބޯޅަ ޓީމަށްވެސް ސަރުކާރުން އެހީވެދީފިއެވެ. ކުޅިވަރުގެ ޤައުމީ މަޖިލީހުން ފާސްކުރި ޤަރާރުގައި ސަރުކާރުގެ ޚަރަދުގައި ގޭމްސްއަށްދާ ކުޅިވަރުތަކުގެ ތެރޭގައި ހޭންޑްބޯޅަ ހިމެނިފައެއްނުވެއެވެ. ނަމަވެސް ހޭންޑްބޯޅަ އެސޯސިއޭޝަންގެ ޓެކްނިކަލް ޑައިރެކްޓަރ މުޙައްމަދު ޝާން މިއަދު ވިދާޅުވީ ސަރުކާރުގެ ޚަރަދުގައި ގޭމްސްއަށް ދިއުމުގެ ފުރުޞަތު އަންހެން ޓީމަށް މިއަދު ލިބިފައިވާކަމަށެވެ. ރައީސުލްޖުމްހޫރިއްޔާގެ ނިންމެވުމުގެ މަތީން ސަރުކާރުން ހޭންޑްބޯޅަ އަންހެން ޓީމް ގޭމްސްއަށް ފޮނުއްވަން ނިންމެވީ މިއަދު މެންދުރުކަމަށް ޝާން ވިދާޅުވިއެވެ. " ހޭންޑްބޯޅަ އަންހެން ޓީމް ގޭމްސްއަށްދާ ސަރުކާރުން އެވީވެދީފި. އެޔަޤީންކަން މިއަދު މެންދުރު 12:30 ހާއިރު ލިބިއްޖެ. ރައީސްގެ ނިންމެވުމުގެ މަތީން އެކަން ހަމަޖެހުނީ. " ޝާން ވިދާޅުވިއެވެ.ހޭންޑްބޯޅަ ޓީމް އޮތީ ޕާކިސްތާނާއި، ބަނގްލަދޭޝްއާއެކު ގްރޫޕް ބީގައެވެ. ގްރޫޕް އޭގައި އޮތީ އިންޑިޔާ، އަފްޣާނިސްޠާން، ނޭޕާލް އަދި ސްރީލަންކާއެވެ. ރާއްޖޭގެ އަންހެން ހޭންޑްބޯޅަ ޓީމް ކުޅޭ ފުރަތަމަ މެޗުގައި އަންނަ މަހުގެ ބާރަވަނަ ދުވަހު ވާދަކުރާނީ ބަނގްލަދޭޝްއާއެވެ. ހޭންޑްބޯޅަ ޓީމްގެ އިތުރުން އަންހެން ފުޓްބޯޅަ ޓީމް ގޭމްސްއަށް ފޮނުވަންވެސް ސަރުކާރުން ޚަރަދުކުރަން ނިންމަވާފައިވާކަމަށް މައުލޫމާތުލިބެއއެވެ. އަންހެން ފުޓްބޯޅަ ޓީމް ގޭމްސްއަށްދާނެކަން އެފްއޭއެމްއިން ކުރިންވެސް ވަނީ ޔަޤީންކޮށްދީފައެވެ.