ޕާކިސްތާނުގެ ކުރީގެ ބޮޑުވަޒީރު އިމުރާން ޚާނަށް ވަފާތެރި 100އަށްވުރެ ގިނަ މެންބަރުން އެ ޤައުމުގެ ޤާނޫނުހަދާ މަޖިލީހުން އިސްތިޢުފާދީފިއެވެ.
ބޮޑުވަޒީރުގެ މަޤާމުން އިމުރާން ޚާން ވަކިކުރުމުން އޭނާ ނިޞްބަތްވަޑައިގަންނަވައި ޕާކިސްތާން ތަޙުރީކީ އިންޞާފް، ޕީޓީއައިން ބުނެފައިވަނީ އެ ޕާޓީން ހުށަހަޅައި ކެނޑިޑޭޓަށް ބޮޑުވަޒީރުކަން ނުދީފިނަމަ ޤާނޫނުހަދާ މަޖިލިސް ހުއްޓުމަކަށް ގެންނާނެކަމަށެވެ. ޕީޓީއައިގެ އިންޒާރުތަކަށް ނުބަލައި އެ ޤައުމުގެ އިދިކޮޅު ޕާޓީތަކުން ބޮޑުވަޒީރުގެ މަޤާމަށް ޢައްޔަންކޮށްފައިވަނީ އެ ޤައުމުގެ ކުރީގެ ބޮޑުވަޒީރު ނަވާޒު ޝަރީފުގެ ކޮއްކޯފުޅުކަމަށްވާ ޝާހުބާޒު ޝަރީފެވެ. އޭނާވަނީ ޕާކިސްތާނުގެ ބޮޑުވަޒީރުގެ މަޤާމުން އިމުރާން ޚާން ވަކިކުރެއްވުމަށް މުޙިއްމު ދަޢުރެއް ޢަދާކުރައްވައިފައެވެ. ބޮޑުވަޒީރުގެ މަޤާމުން އިމުރާން ޚާން ވަކިކޮށްފައިވަނީ 342 މެންބަރުންގެ މައްޗަށް އެކުލެވޭ ޕާކިސްތާނުގެ ޤާނޫނުހަދާ މަޖިލީހުގެ 174 ވޯޓުންނެވެ.
ޢުމުރުފުޅުން 69 އަހަރުގެ އިމުރާން ޚާނުގެ ވެރިކަން ނިމުމަކަށް އައުމުން 2023ވަނަ އަހަރުގެ އޯގަސްޓު މަހުގެ ތެރޭގައި ޢާއްމު އިންތިޚާބެއް ބާއްވަންދެން ޕާކިސްތާނުގެ ބޮޑުވަޒީރުކަން ކުރައްވާނެކަމަށް ބެލިވެފައިވަނީ ޝާހުބާޒެވެ. ނަމަވެސް ޤާނޫނުހަދާ މަޖިލީހުން 100އަށްވުރެ ގިނަ މެންބަރުން އިސްތިޢުފާދިނުމުން އެ ޤައުމުގެ ސިޔާސީ މަޞްރަޙު އިތުރަށް ހަލަބޮލިވާނެއެވެ. އަދި ކުރިޔަށް ދެ މަސްދުވަހުގެ ތެރޭގައި 100އަށްވުރެ ގިނަ ބައި އިލެކްޝަން ބާއްވަން މަޖުބޫރުވާނެއެވެ. ޕާކިސްތާނުގެ އިންތިޚާބާބެހޭ ވުޒާރާއިން ބުނެފައިވަނީ އެ ޤައުމުގައި އެންމެ އަވަހަށްވެސް އިންތިޚާބެއް ބޭއްވޭނީ އަންނަ އޮކްޓޯބަރު މަހުގެ ތެރޭގައިކަމަށެވެ.
ޢުމުރުފުޅުން 70 އަހަރުގެ ޝާހުބާޒު ފާހަގަވެފައިވަނީ ސިޔާސީވެރިއަކަށްވުރެ ބޮޑަށް އިދާރީ ބޭފުޅެއްގެ ގޮތުގައެވެ. އަދި އޭނާއަށް ޕާކިސްތާނުގެ ބާރުގަދަ އަދި ނުފޫޒުގަދަ އަސްކަރިއްޔާއާއި ހުޅަނގުގެ ބާރުތަކުގެ ތާޢީދު އޮވެއެވެ. އޭނާވަނީ ޤައުމަށް ކުރިމަތިވެފައިވާ އިޤްތިޞާދީ އަދި ސިޔާސީ ހަލަބޮލިކަމުން އަރައިގަތުމަށް އެއްބައިވަންތަކަން އިސްކުރަން އެދިވަޑައިގެންފައެވެ. ނަމަވެސް އޭނާއާ ދެކޮޅަށް ޕާކިސްތާނުގައި މީގެ ކުރިން ދުވަހުކުވެސް ނުކުރާހާ ވަރުގަދަ މުޒާހަރާތަކެއް ކުރަންވަނީ ފަށައިފައެވެ.
1947ވަނަ އަހަރުގެ ތެރޭގައި އިނގިރޭސިވިލާތުން މިނިވަންކަން ލިބުނުފަހުން 220 މިލިޔަން މީހުންގެ އާބާދީއެއް އޮންނަ ޕާކިސްތާނުގައި ބޮޑުވަޒީރުގެ މަޤާމާ ޙަވާލުވެވަޑައިގެންނެވި އެއްވެސް ބޭފުޅަކަށް ފަސް އަހަރުގެ ދަޢުރެއް ފުރިހަމަކުރެއްވިފައެއް ނުވެއެވެ. އެ ގޮތުން 1958ން 1971އަށް، 1977ން 1988އަށް އަދި 1999ން 2008އަށް އެ ޤައުމުގައި އޮތީ އަސްކަރީ ވެރިކަމެކެވެ.