ޕާކިސްތާނުގެ ކުރީގެ ބޮޑުވަޒީރު ނަވާޒު ޝަރީފުގެ ކޮއްކޯފުޅުކަމަށްވާ ޝާހުބާޒު ޝަރީފަށް ބޮޑުވަޒީރުކަން ދިނުމަށް އެ ޤައުމުގެ އިދިކޮޅު ޕާޓީތަކުން ތާޢީދުކޮށްފިއެވެ.
ޢުމުރުފުޅުން 70 އަހަރުގެ ޝާހުބާޒުވަނީ ޕާކިސްތާނުގެ ބޮޑުވަޒީރުގެ މަޤާމުން އިމުރާން ޚާން ވަކިކުރެއްވުމަށް މުޙިއްމު ދަޢުރެއް ޢަދާކުރައްވައިފައެވެ. ބޮޑުވަޒީރުގެ މަޤާމުން އިމުރާން ޚާން ވަކިކޮށްފައިވަނީ 342 މެންބަރުންގެ މައްޗަށް އެކުލެވޭ ޕާކިސްތާނުގެ ޤާނޫނުހަދާ މަޖިލީހުގެ 174 ވޯޓުންނެވެ.
އިމުރާން ޚާނުގެ ޕާކިސްތާން ތަޙުރީކީ އިންޞާފް، ޕީޓީއައިންވެސްވަނީ ބޮޑުވަޒީރުގެ މަޤާމަށް ކުރީގެ ޚާރިޖީ ވަޒީރު ޢައްޔަންކުރުމަށް ހުށަހަޅައިފައެވެ. އަދި ބޮޑުވަޒީރުގެ މަޤާމަށް ޕީޓީއައިގެ ކެނޑިޑޭޓު ޢައްޔަންނުކޮށްފިނަމަ ޤާނޫނުހަދާ މަޖިލީހުން އެ ޕާޓީގެ ހުރިހާ މެންބަރުން އިސްތިޢުފާދޭނެކަމުގެ އިންޒާރުވަނީ ދީފައެވެ. އެއާއެކު ޕާކިސްތާނުގައި ޢާއްމު އިންތިޚާބެއް ބޭއްވުމަށް މަޖުބޫރުވާނެއެވެ.
ޢުމުރުފުޅުން 69 އަހަރުގެ އިމުރާން ޚާނުގެ ވެރިކަން ނިމުމަކަށް އައުމުން 2023ވަނަ އަހަރުގެ އޯގަސްޓު މަހުގެ ތެރޭގައި ޢާއްމު އިންތިޚާބެއް ބާއްވަންދެން ޕާކިސްތާނުގައި ވެރިކަންކުރާނީ އަލަށް ޢައްޔަންކުރާ ބޮޑުވަޒީރެވެ. ޕާކިސްތާނުގެ އިންތިޚާބާބެހޭ ވުޒާރާއިން ބުނެފައިވަނީ އެ ޤައުމުގައި އެންމެ އަވަހަށްވެސް އިންތިޚާބެއް ބޭއްވޭނީ އަންނަ އޮކްޓޯބަރު މަހުގެ ތެރޭގައިކަމަށެވެ.
1947ވަނަ އަހަރުގެ ތެރޭގައި އިނގިރޭސިވިލާތުން މިނިވަންކަން ލިބުނުފަހުން 220 މިލިޔަން މީހުންގެ އާބާދީއެއް އޮންނަ ޕާކިސްތާނުގައި ބޮޑުވަޒީރުގެ މަޤާމާ ޙަވާލުވެވަޑައިގެންނެވި އެއްވެސް ބޭފުޅަކަށް ފަސް އަހަރުގެ ދަޢުރެއް ފުރިހަމަކުރެއްވިފައެއް ނުވެއެވެ. އެ ގޮތުން 1958ން 1971އަށް، 1977ން 1988އަށް އަދި 1999ން 2008އަށް އެ ޤައުމުގައި އޮތީ އަސްކަރީ ވެރިކަމެކެވެ.