ސުރީ ލަންކާގެ ރައީސް ގޮތަބަޔާ ރާޖަޕަކްސައާ ދެކޮޅަށް އިތުބާރުނެތްކަމުގެ ވޯޓެއް ނަގަން އެ ޤައުމުގެ އިދިކޮޅު ޕާޓީތަކުން ތައްޔާރުވާން ފަށައިފިއެވެ.
ސުރީ ލަންކާގެ މައި އިދިކޮޅު ޕާޓީކަމަށްވާ ސަމާގި ޖާނާ ބެލްވެގާޔާ، އެސްޖީބީން ބުނެފައިވާ ގޮތުގައި އެ ޤައުމަށް ކުރިމަތިވެފައިވާ ނާޒުކު އިޤްތިޞާދީ ޙާލަތުގެ ސަބަބުން ދަތި ޙާލުގައި ޖެހިފައިވާ ޢާއްމުންގެ ކެކުޅުންތަކަށް އަވަސް ޙައްލެއް ސަރުކާރަށް ނުހޯދިއްޖެނަމަ ގޮތަބަޔާއާ ދެކޮޅަށް އިތުބާރުނެތްކަމުގެ ވޯޓެއް ނަގަން ތައްޔާރުވަމުންދާކަމަށެވެ. އަދި ސުރީ ލަންކާގެ ބާރުތައް މަސްހުނިވެފައިވާކަމަށާއި ރައީސަށް ލިބިގެންވާ ބާރުތައް ހަނިކޮށް ވެރިކަމުގެ ބާރާއި ޤާނޫނުހަދާ މަޖިލީހުގެ ބާރާއި ޢަދުލްއިންޞާފުގެ ބާރު ވަކިކުރުމަށް އިދިކޮޅު ވެރިންގެ މެދުގައި މަޝްވަރާކޮށްފައިވާކަމަށްވެސް އެސްޖީބީން ބުނެފައިވެއެވެ.
1978ވަނަ އަހަރުގެ ތެރޭގައި ސުރީ ލަންކާގައި ރިޔާސީ ނިޒާމެއް ޤާއިމުކުރެވުނުފަހުން ބޭއްވި ހުރިހާ ރިޔާސީ އިންތިޚާބެއްގައި ވާދަކުރި ކެނޑިޑޭޓުންވަނީ ރައީސަށް ލިބިގެންވާ ބާރުތައް ހަނިކުރުމަށް ވަޢުދުވެފައެވެ. ނަމަވެސް އިންތިޚާބު ކާމިޔާބުކުރުމަށްފަހު އެއްވެސް ކެނޑިޑޭޓެއް އެ ވަޢުދު ފުއްދާފައެއް ނުވެއެވެ.
2019ވަނަ އަހަރުގެ ތެރޭގައި ސުރީ ލަންކާގައި ބޭއްވި ރިޔާސީ އިންތިޚާބު ގޮތަބަޔާ ކާމިޔާބުކުރައްވާފައިވަނީ ބޮޑު އަޣްލަބިއްޔަތަކުންނެވެ. އަދި އޭގެ އަހަރެއްފަހުން ބޭއްވި ޢާއްމު އިންތިޚާބުގައި ސަރުކާރަށް ޤާނޫނުހަދާ މަޖިލީހުގެ ތިންބައިކުޅަ ދެބައިގެ އަޣްލަބިއްޔަތެއް ލިބުނެވެ. އެއާއެކު ގޮތަބަޔާގެ ބޭބޭފުޅު މަހިންދަ ރާޖަޕަކްސައަށް ބޮޑުވަޒީރުކަން ދެއްވައި ރައީސަށް ލިބިގެންވާ ބާރުތައް އިތުރުކުރެއްވިއެވެ.