އދގެ އިންސާނީ ޙައްޤުތަކާބެހޭ ކައުންސިލުން ރަޝިޔާ ވަކިވެއްޖެއެވެ. އެ ކައުންސިލުން ރަޝިޔާއިން ވަކިވެފައިވަނީ އެ ކައުންސިލުގެ މެންބަރުކަމުން ރަޝިޔާ ސަސްޕެންޑުކުރުމަށް 193 މެންބަރުންގެ މައްޗަށް އެކުލެވޭ އދގެ ޢާއްމު މަޖިލީހުން ޤަރާރެއް ފާސްކުރުމުންނެވެ.
އެމެރިކާ އިސްވެ ޢާއްމު މަޖިލީހަށް ހުށަހެޅި ޤަރާރުގައި ބުނެފައިވަނީ ޔޫކްރެއިނުގައި ކުރަމުންދާ ހަނގުރާމާގައި ރަޝިޔާއިން ދުރާލައި ރާވައިގެން ލާއިންސާނީ ޖަރީމާތައް ހިންގާފައިވާކަމަށެވެ. 47 މެންބަރު ޤައުމުގެ މައްޗަށް އެކުލެވޭ އިންސާނީ ޙައްޤުތަކާބެހޭ ކައުންސިލުން ރަޝިޔާ ސަސްޕެންޑުކުރުމަށް ފާސްކޮށްފައިވަނީ 93 ވޯޓުންނެވެ. ރަޝިޔާއާ އެއްކޮޅަށް 24 ޤައުމަކުން ވޯޓު ދީފައިވެއެވެ. އަދި 58 ޤައުމަކުން ވަކިކޮޅަކަށް ވޯޓުދީފައެއް ނުވެއެވެ.
އިންސާނީ ޙައްޤުތަކާބެހޭ ކައުންސިލުން ރަޝިޔާ ވަކިވެފައިވަނީ ތިން އަހަރުގެ ދަޢުރެއްގެ ދެވަނަ އަހަރުގެ ތެރޭގައެވެ. އިންސާނީ ޙައްޤުތަކާބެހޭ ކައުންސިލުން އެއްވެސް ޤައުމެއް ސަސްޕެންޑުކުރުމަކީ ޢާއްމުކަމެއް ނޫނެވެ. އެ ގޮތުން އެންމެފަހުން އެ ކައުންސ؛ިލުން ސަސްޕެންޑުކުރި ޤައުމަކީ 2011ވަނަ އަހަރުގެ ތެރޭގައި ލީބިޔާއެވެ.
އިންސާނީ ޙައްޤުތަކާބެހޭ ކައުންސިލުގެ ނިންމުންތަކުގައި ޤާނޫނީ ބަރުދަނެއް ނެތް ނަމަވެސް އެ ކައުންސި؛ލަށް އިންސާނީ ޙައްޤުތަކާބެހޭ މައްސަލަތައް ތަޙުޤީޤުކުރެވޭނެއެވެ. އެ ގޮތުން ޔޫކްރެއިނުގައި ރަޝިޔާއިން ކުރަމުންދާ ހަނގުރާމައާ ގުޅުންހުރި މައްސަލަތަކެއް އެ ކައުންސި؛ލުންވަނީ ތަޙުޤީޤކުރަން ފަށައިފައެވެ.
ފެބްރުއަރީ މަހުގެ 24ވަނަ ދުވަހުން ފެށިގެން ވައިގެމަގުންނާއި ކަނޑުމަގުންނާއި އެއްގަމުން ޔޫކްރެއިނަށް ދެމުންދާ ވަރުގަދަ ޙަމަލާތަކުގެ ސަބަބުން ރަޝިޔާއާ ދެކޮޅަށް ދެ ފަހަރެއްގެ މަތިން ޢާއްމު މަޖިލީހުންވަނީ ޤަރާރެއް ފާސްކޮށްފައެވެ. އެ ޤަރާރުތައް ފާސްކޮށްފައިވަނީ 141 އަދި 140 ވޯޓުންނެވެ. ނަމަވެސް އެ ޤަރާރުތަކަށް ވޯޓުދިން ގިނަ ޤައުމުތަކުން އިންސާނީ ޙައްޤުތަކާބެހޭ ކައުންސިލުން ރަޝިޔާ ސަސްޕެންޑުކުރުމަށް ވޯޓުދިނުމުގެ ބަދަލުގައި ޚިޔާރުކޮށްފައިވަނީ ވަކިކޮޅަކަށް ވޯޓުނުދިމަށެވެ.