އިސްރާއީލުގެ ޔަހޫދީންނާ ދެކޮޅަށް އަނެއްކާވެސް ނުރައްކާތެރި ބަޑީގެ ޙަމަލާއެއްދީފިއެވެ.
އިސްރާއީލުގެ ވެރިރަށް ތަލް އަބީބުގެ މުޙިއްމު ސަރަޙައްދަކަށް ދިން ބަޑީގެ ޙަމަލާގައި ދެ މީހުން މަރުވެ އިތުރު ބަޔަކުވަނީ ޒަޚަމުވެފައެވެ. އޭގެ ތެރެއިން ތިން މީހެއްގެ ޙާލު ވަރަށް ގޯސްކަމަށްވެއެވެ. ފާއިތުވި ދުވަސްތަކުގައި ތަލް އަބީބުގެ އެކި ސަރަޙައްދުތަކުގައި ދީފައިވާ ޙަމަލާތަކުގައި 13 މީހުންވަނީ މަރުވެފައެވެ. އޭގެ ތެރެއިން އެއް ޙަމަލާގެ ޒިންމާ އައިއެސް ޖަމާޢަތުން އުފުލާފައިވެއެވެ.
އިސްރާއީލުގެ އިސްތިޢުމަރީ ފައުޖުތަކުން ބުނެފައިވަނީ އެންމެ ފަހުގެ ޙަމަލާދީފައިވަނީ 28 އަހަރުގެ ފަލަސްޠީނަށް ނިޞްބަތްވާ ޒުވާނެއްކަމަށެވެ. ފަލަސްޠީނުގެ ހުޅަނގު އައްސޭރީގެ ޖިނިންނަށް އުފަން އެ ޒުވާނާ އިސްރާއީލަށް އެތެރެވެފައިވަނީ ޤަވައިދާ ޚިލާފަށްކަމަށް ޔަހޫދީންގެ އިސްތިޢުމަރީ ފައުޖުތަކުން ބުނެފައިވެއެވެ. އަދި ޙަމަލާއަށްފަހު މިސްކިތަކަށް ވަދެ ފިލައި ހުއްޓައި ޔަހޫދީ ފައުޖުތަކުންވަނީ އޭނާ ޝަހީދުކޮށްލައިފައެވެ.
ހުޅަނގުގެ ތާޢީދު ލިބިފައިވާ ފަލަސްޠީނުގެ ރައީސް މަޙްމޫދު ޢައްބާސްވަނީ ޔަހޫދީންނާ ދެކޮޅަށް ދެމުންދާ ބަޑީގެ ޙަމަލާތައް ކުށްވެރިކުރައްވައިފައެވެ. އޭނާ ވިދާޅުވި ގޮތުގައި ޔަހޫދީންނާއި ޢަރަބިންނާ ދެކޮޅަށް ދެމުންދާ އެފަދަ ޙަމަލާތަކުގެ ސަބަބުން ޙާލަތު އިތުރަށް ގޯސްވެ ޞުލްޙައަށް ކުރަމުންދާ މަސައްކަތްތަކަށް ހުރަސްއެޅޭނެއެވެ.