އާމްދަނީން ޓެކްސް ނެގުމުގައި އިސްތިސްނާ ލިބޭނީ ދައުލަތުގެ އާމްދަނީއަށް ކުރާ އަސަރަށް ބެލުމަށްފަހު
ވިޔަފާރި މަޝްރޫޢުތަކާއި ދާއިރާތަކުން ލިބޭ އާމްދަނީން ޓެކްސް ދެއްކުމުން، ޚާއްޞަ އިސްތިސްނާ ދިނުމާއިބެހޭ ގަވާއިދު ދިވެހި ސަރުކާރުގެ ގެޒެޓްގައި މިހާރު ވަނީ ޝާއިއުކޮށްފައެވެ. މި ގަވާއިދުގެ މަގުސަދަކީ، ވަކި ވިޔަފާރި މަޝްރޫޢުތަކުން ނުވަތަ ދާއިރާތަކުން ލިބޭ އާމްދަނީން ޓެކްސް ދެއްކުމުން، އިސްތިސްނާ ދިނުމަށް ބަލަންޖެހޭ ޝަރުޠުތަކާއި، ޢަމަލުކުރާނެ އުސޫލުތަކާއި އިޖުރާއަތުތައް ކަނޑައެޅުމާއި، އިސްތިސްނާ ދެވޭ ފަރާތްތަކުގެ ދަފުތަރު ދިވެހި ސަރުކާރުގެ ގެޒެޓުގައި ޝާއިޢު ކުރުމުގެ އިޖުރާއަތުތައް ބަޔާންކުރުމެވެ.
މި ގަވާއިދުގައިވާ ގޮތުން އިސްތިސްނާ ހޯދުމަށް އެދި ވިޔަފާރި މަޝްރޫއު ހިންގާ ފަރާތްތަކުން އެ މަޝްރޫޢެއް ނިސްބަތްވާ ބެލެނިވެރި ވުޒާރާއަކަށް ހުށަހަޅަންޖެހެއެވެ. ވަޒީރުންގެ މަޖިލީހުގެ ސަބްކޮމިޓީއެއްގެ ލަފަޔާއެކު، ވަޒީރުންގެ މަޖިލީހުގެ މަޝްވަރާގެ މަތީން އެ ހުށަހެޅުމާމެދު ގޮތެއް ނިންމާނީ ރައީސުލްޖުމްހޫރިއްޔާއެވެ. އިސްތިސްނާ ދިނުމަށް ރައީސުލްޖުމްހޫރިއްޔާ ނިންމައިފިނަމަ، އެ އިސްތިސްނާ ދެމިއޮންނާނީ، ރައީސުލްޖުމްހޫރިއްޔާ ކަނޑައަޅާ މުއްދަތަކަށްކަމަށްވެސް ޤަވާއިދުގައި ވަނީ ބަޔާންކޮށްފައެވެ.
ގަވާއިދުގައިވާ ގޮތުގައި އިސްތިސްނާ ދިނުމުގައި 3 ކަމަކަށް ބަލާނެއެވެ. އޭގެތެރޭގައި އެ އިސްތިސްނާއެއް ދިނުމުގެ ސަބަބުން ދައުލަތުގެ އާމްދަނީއަށް ކުރާނެ އަސަރާއި، އިޤްތިޞާދީ ގޮތުންނާއި އިޖުތިމާޢީ ގޮތުން ކުރާނެ ފައިދާއާއި ގެއްލުމުގެ އިތުރުން އިސްތިސްނާ ދިނުމުން ހާސިލުވުމަށް ބޭނުންވާ މަގުސަދު ހާސިލުވާނެ މިންވަރު ހިމެނެއެވެ.
އާމްދަނީން ޓެކްސް ދެއްކުމުން އިސްތިސްނާކުރުމަށް ރައީސުލްޖުމްހޫރިއްޔާ ކަނޑައަޅާ ފަރާތްތަކުގެ ދަފުތަރެއް މިނިސްޓްރީން ދިވެހި ސަރުކާރުގެ ގެޒެޓުގައި ޝާއިޢުކޮށް އަދާހަމަކުރަމުން ގެންދަންވާނެކަމަށްވެސް މި ގަވާއިދުގައި ވަނީ ބުނެފައެވެ.