ހަނގުރާމައިގެ ސަބަބުން ޔޫކްރެއިނުގައި ޙާލުގައި ޖެހިފައިވާ އެތައް މިލިޔަން މީހުންނަށް ބޭނުންވާ އިންސާނީ އެހީތެރިކަން ފޯރުކޮށްދެވޭނެ ރައްކާތެރި މާޙައުލެއް ނެތްކަމަށް އިންސާނީ އެހީތެރިކަމާބެހޭ އދގެ އަންޑަރ ސެކެޓުރީ ޖެނެރަލް މާޓިން ގުރިފިތްސް ވިދާޅުވެއްޖެއެވެ.
ރަޝިޔާގެ ވެރިރަށް މޮސްކޯއަށް ވަޑައިގެން އެ ޤައުމުގެ ޚާރިޖީ ވަޒީރު ސަރްގައި ލަވުރޯފާ ބައްދަލުކުރެއްވުމަށްފަހު އދގެ ސަލާމަތީ މަޖިލީހުގައި ވާހަކަފުޅުދައްކަވަމުން ގުރިފިތްސް ވިދާޅުވީ ޔޫކްރެއިނުގެ ޙާލަތު ރަނގަޅުވެ އެ ޤައުމުގައި ޙާލުގައި ޖެހިފައިވާ އެތައް މިލިޔަން މީހުންނަށް އިންސާނީ އެހީތެރިކަން ފޯރުކޮށްދެވޭނެ ގޮތެއް ނެތްކަމަށެވެ. އަދި އިންސާނީ އެހީތެރިކަން ފޯރުކޮށްދެވެން އޮތް ހަމައެކަނި ގޮތަކީ ހަނގުރާމަ ހިނގަމުންދާ ސަރަޙައްދުގައި ޙާލުގައި ޖެހިފައިވާ އެތައް މިލިޔަން މީހުންނެއް އެ ސަރަޙައްދުތައް ދޫކޮށް ދިޔުމުގެ ފުރުޞަތު ފަހިކޮށްދިނުންކަމަށް އޭނާ ވިދާޅުވިއެވެ. ނަމަވެސް އެފަދަ މަގެއް ތަނަވަސްކޮށްދިނުމަށް ރަޝިޔާއާއި ޔޫކްރެއިނުގެ ފައުޖުތަކުން އެދެވޭ އެއްބާރުލުމެއް ނުލިބޭކަމަށްވެސް އޭނާ ވިދާޅުވިއެވެ.
ފެބްރުއަރީ މަހުގެ 24ވަނަ ދުވަހު ޔޫކްރެއިނަށް ރަޝިޔާއިން ދޭން ފެށި ވަރުގަދަ ޙަމަލާތަކުގެ ސަބަބުން 1,430 މީހުން މަރުވެފައިވާކަމަށް އދން ބުނެއެވެ. އަދި ހަނގުރާމައިން ސަލާމަތްވުމަށް 4.2 މިލިޔަން މީހުން އަވަށްޓެރި ޤައުމުތަކަށް ހިޖުރަކޮށްފައިވާކަމަށްވެސް އދން ބުނެފައިވެއެވެ. އޭގެ އިތުރުން ޔޫކްރެއިނުގައި ހަނގުރާމަކުރަމުންދާ ސަރަހައްދުތަކުގައިވެސް އެތައް މިލިޔަން މީހުންނެއްވަނީ ތާށިވެފައެވެ. އަދި އެ މީހުންނަށް ބޭނުންވާ އިންސާނީ އެހީތެރިކަން ފޯރުކޮށްދެވޭނެ ގޮތެއް ހޯދިފައެއް ނުވެއެވެ.
އދގެ ސެކެޓުރީ ޖެނެރަލް އެންތޮނިޔޯ ގުތެޚޭޝް ވިދާޅުވެފައިވާ ގޮތުގައި ޔޫކްރެއިނުގައި ކުރަމުންދާ ހަނގުރާމައިގެ ސީދާ އަސަރު 1.2 ބިލިޔަން މީހުންނަށްކުރާނެއެވެ. އަދި އޭގެ ތެރެއިން ގިނަ މީހުންނަކީ ހަނގުރާމައިގެ ކުރިންވެސް ނާޒުކު ޙާލަތެއްގައި ދިރިއުޅެމުންދިޔަ ބައެއްކަމަށް އޭނާވަނީ ފާހަގަކުރައްވައިފައެވެ.