ކުވައިތުގެ ޤާނޫނުހަދާ މަޖިލީހާ ޚިޔާލުތަފާތުވެ އެ ޤައުމުގެ ސަރުކާރު އަނެއްކާވެސް އިސްތިޢުފާދީފިއެވެ.
ކުވައިތުގެ ވަލީއަޙުދު މިޝްޢާލް އާލްއަޙުމަދު އާލްޖާބިރު އާލްޞަބާޙަށް ފޮނުއްވި ސިޓީފުޅެއްގައި އެ ޤައުމުގެ ބޮޑުވަޒީރު ޝައިޚު ޞަބާޙު އާލްޚާލިދު އާލްޞަބާޙުވަނީ ސަރުކާރު އިސްތިޢުފާދީފައިވާކަމަށް ވިދާޅުވެފައެވެ. ކުވައިތުގެ ސަރުކާރު އިސްތިޢުފާދިނުމަށް ނިންމީ ބޮޑުވަޒީރުގެ މަޤާމުން ޝައިޚު ޞަބާޙު އާލްޚާލިދު ވަކިކުރުމަށް އިތުބާރުނެތްކަމުގެ ވޯޓެއް ނެގުމުގެ މަސައްކަތް އެ ޤައުމުގެ ޤާނޫނުހަދާ މަޖިލީހުން ފެށުމުންނެވެ.
2019ވަނަ އަހަރުގެ ތެރޭގައި ކުވައިތުގެ ބޮޑުވަޒީރުގެ މަޤާމާ ޙަވާލުވެވަޑައިގަތް ޝައިޚު ޞަބާޙު އާލްޚާލިދަށްވަނީ ސަރުކާރެއް ހިންގެވުމަށް ބޮޑެތި ދަތިތަކަކާ ކުރިމަތިލައްވަން ޖެހިވަޑައިގެންފައެވެ. އެ ގޮތުން އޭނާއަކީ އެ ޤައުމުގެ ޝާހީ ޢާއިލާގެ މެންބަރަކަށްވި ނަމަވެސް އޭނާއާމެދު ކުރެވޭ ޚިޔާނާތުގެ ތުޙުމަތުތަކާ ގުޅޭގޮތުން ސުވާލުކޮށް ތަޙުޤީޤެއް ހިންގުމަށް ކުވައިތުގެ ޤާނޫނުހަދާ މަޖިލީހުންވަނީ ވަރަށް ބޮޑަށް މަސައްކަތްކޮށްފައެވެ. އެންމެ ފަހުން އިސްތިޢުފާދިން ކުވައިތުގެ ސަރުކާރަކީ 2021ވަނަ އަހަރުގެ ފަހުން އެ ޤައުމުގައި އެކުލަވާލި ތިންވަނަ ސަރުކާރެވެ.
ޢަރަބި އެހެން ޤައުމުތަކާ ޚިލާފަށް ކުވައިތުގެ ޤާނޫނުހަދާ މަޖިލީހަށްވަނީ ބޮޑެތި ބާރުތަކެއް ދީފައެވެ. އެ ގޮތުން ޤާނޫނުތައް ފާސްކުރުމާއި ޤާނޫނުތައް ހުއްޓުވުމާއި ސަރުކާރުގެ އިސްވެރިންނާ ސުވާލުކުރުމާއި ސަރުކާރުގެ އިސްވެރިންނާ ދެކޮޅަށް އިތުބާރުނެތްކަމުގެ ވޯޓުނެގުމުގެ ބާރު އެ މަޖިލީހަށް ލިބިގެންވެއެވެ. ނަމަވެސް އެ ޤައުމުގައި ސިޔާސީ ޕާޓީތައް ހިންގުމުގެ ޙުއްދަދީފައެއް ނުވެއެވެ.