ދުބާއީ އިންޓަނޭޝަނަލް ހޯލީ ޤުރްއާން ކޮމްޕެޓިޝަން 2022ގައި ދިވެހިރާއްޖެ ތަމްސީލުކުރަމުންދާ އަލްޙާފިޡް އަޙްމަދު ނަބީޙް މުބާރާތުގެ ދެވަނަ ބުރަށް ހޮވިއްޖެއެވެ. ފުރަތަމަ ބުރު ކުރިއަށް ގެންދިޔައީ ރަމަޟާން މަހުގެ ފުރަތަމަ 3 ދުވަހުއެވެ. މިއީ ބައިނަލްއަޤްވާމީ ފެންވަރެއްގައި ބާއްވާ މިފަދަ އެންމެ ބޮޑު މުބާރާތެވެ.
މި މުބާރާތުގައި ދިވެހިރާއްޖެއިން ބައިވެރިވާނެ ފަރާތެއް ހޮވާފައިވަނީ، ކީރިތި ޤުރުއާނާ ބެހޭ މަރުކަޒުން ކުރިއަށްގެންދިޔަ މުބާރާތަކަށް ފަހުއެވެ. ނަބީހުގެ މި ކާމިޔާބީއާއި ގުޅޭގޮތުން ޤުރުއާނާ ބެހޭ ޤައުމީ މަރުކަޒު ހިންގުމާ ޙަވާލުވެ ހުންނެވި އައްޝައިޚް އިލްޔާސް ޖަމާލް ވިދާޅުވީ، ނަބީޙްގެ މި ކާމިޔާބީއަކީ ދިވެހިރާއްޖެ ފަޚުރުވެރިވާ ފަދަ ބޮޑު ކާމިޔާބީއެއް ކަމަށެވެ.
އުމުރުން 19 އަހަރުގެ ނަބީޙުއަކީ ކީރިތި ޤުރުއާން ކިޔެވުމުގެ އެކިއެކި މުބާރާތްތަކުގައި ޤައުމީ ފެންވަރުގެ ގިނަ ކާމިޔާބީތަކެއް ޙާޞިލުކޮށްފައިވާ ފަރާތެކެވެ.
ނަބީހްއަކީ ވަރަށް ލަސްލަހުން އުނދަގުލާއެކު މެނުވީ ވާހަކަ ނުދެއްކޭ، އަދި ޚާއްޞައެހީއަށް ބޭނުންވާ ކުއްޖެކެވެ. އަކުރުތައް ފާޅުކުރުމާއި އަޑު ނެރުމުގައިވެސް އުނދަގޫތައް ތަޙައްމަލްކުރާ ކުއްޖެކެވެ. ނަމަވެސް ޤުރުއާން ކިޔަވަން ބޭނުންވުމާއެކު ވަރަށް ފަސޭހަކަމާއެކު އަޑު ނެރެ، އަކުރުތައް މަޚްރަޖުން ކިޔަވައެވެ. އެހެން ކަމުން މިއީ ދިވެހީން ފަޚުރުވެރިވާ ފަދަ އާދަޔާ ޚިލާފު ކަމެކެވެ.
ނަބީޙްގެ އާއިލާއިން ފާހަގަކުރާ ގޮތުގައި ނަބީޙްގެ އެކުވެރިޔަކީ ޤުރްއާނެވެ. އޭނާ ހުރިހާ ވަގުތެއްހެން ހޭދަކުރަނީ ޤުރްއާނާއެކުގައެވެ.
ދުނިޔޭގެ މަޝްހޫރު ޤާރީން ކިޔަވާގޮތަށް ޤުރްއާން ކިޔެވުމާއި ރީތި ރާގުރާގަށް ބަންގި ގޮވުމަކީ ނަބީޙް އެންމެ ކުރާހިތްވާކަމެވެ.
މުބާރާތުގައި ބައިވެރިވުމަށް ނަބީޙު ދުބާއީއަށް ފުރީ މަރޗް 30ވަަނަ ދުވަހުއެވެ. މުބާރާތުގެ ކިޔެވުން ކުރިއަށްދާނީ ރަމަޟާންމަހުގެ 1 އިން 14 ވަނަ ދުވަހުގެ ނިޔަލަށެވެ.