ހަނގޭރީގައި ބޭއްވި ޢާއްމު އިންތިޚާބު ކާމިޔާބުކުރައްވައި ހަތަރުވަނަ ދަޢުރަކަށް ވިކްތޯ އޮރްބާން އިންތިޚާބުވެވަޑައިގެންފިއެވެ.
ހަނގޭރީގައި ބޭއްވި ޢާއްމު އިންތިޚާބުގެ ވަޤުތީ ނަތީޖާއިން ދައްކާގޮތުގައި އޮރްބާންވަނީ އެ ޤައުމުގެ ޤާނޫނުހަދާ މަޖިލީހުގެ 135 ގޮނޑި ކާމިޔާބުކުރައްވައިފައެވެ. އަދި އޮރްބާނާ ދެކޮޅަށް އެ ޤައުމުގެ އިދިކޮޅު ޕާޓީތަކުން އެކުލަވާލި އިއްތިޙާދަށް ކާމިޔާބުކުރެވިފައިވަނީ 56 ގޮނޑިއެވެ.
އެހެން ޤައުމުތަކުގެ ކުންފުނިތައް ހަންގޭރީން ބޭރުކޮށް އެ ޤައުމުގެ ވިޔަފާރިވެރިންނަށް އިތުރު ދޮރުތައް ހުޅުވާލުމަށް އޮރްބާންވަނީ ވަޢުދުވެވަޑައިގެންފައެވެ. އެއާއެކު އަވަށްޓެރި ޤައުމުތަކުންނާއި ވިލާތުގެ އިއްތިޙާދުންވަނީ ކުރިޔަށްއޮތް ދުވަސްތަކުގައި ހަންގޭރީގެ ސަރުކާރުން އަޅާނެ ފިޔަވަޅުތަކާމެދު ކަންބޮޑުވުންފާޅުކޮށްފައެވެ. އަދި އޮރްބާނަށް ލިބިވަޑައިގަތް ކާމިޔާބަކީ ދިމީޤްރާޠީ ހަމަތަކާއި ނޫސްވެރިކަމުގެ މިނިވަންކަމަށާއި ބައިމަދު މީސްތަކުންގެ ޙައްޤުތައް ކަށަވަރުކުރަން ކުރަމުންދާ މަސައްކަތްތައް ހުއްޓުމަކަށް އަންނާނެ ކަމެއް ވިލާތުގެ ޤައުމުތަކުންވަނީ ބުނެފައެވެ.
ހަނގޭރީގައި ބޭއްވި ޢާއްމު އިންތިޚާބުގެ ނަތީޖާއާމެދު އެންމެ ބޮޑު ހިތްހަމަޖެހުމެއް ލިބޭނެ ޤައުމަކީ ރަޝިޔާއެވެ. ހަންގޭރީ ފާހަގަވެފައިވަނީ ރަޝިޔާއާ ދެކޮޅަށް ހުޅަނގުގެ ބާރުތަކުން އަޅަމުންދާ ފިޔަވަޅުތަކާ ދެކޮޅަށް ވަކާލާތުކުރައި ޤައުމެއްގެ ގޮތުގައެވެ. އެ ގޮތުން އެކި ފަހަރުމަތިން އޮރްބާންވަނީ ރަޝިޔާއާ ދެކޮޅަށް އަޅާފައިވާ ހަރުކަށި އިޤްތިޞާދީ ދަތިކުރުމުގެ ފިޔަވަޅުތައް އުވާލުމަށް ގޮވާލައްވައިފައެވެ. އަދި 2004ވަނަ އަހަރުގެ ތެރޭގައި ވިލާތުގެ އިއްތިޙާދުގެ މެންބަރުކަން ހޯދާފައިވާ ހަންގޭރީންވަނީ ރަޝިޔާއާ ދެކޮޅަށް އެ އިއްތިޙާދުން އަޅާފައިވާ ފިޔަވަޅުތައް ތަންފީޒުކުރުމަށްވެސް ދެކޮޅުހަދައިފައެވެ.
ޢުމުރުފުޅުން 58 އަހަރުގެ އޮރްބާން ހަންގެރީގެ ބޮޑުވަޒީރުކަން އެންމެ ފުރަތަމަ ކުރެއްވީ 1998ން 2002އަށެވެ. އޭގެ ފަހުން އޭނާ އަލުން އެ މަޤާމާ ޙަވާލުވެވަޑައިގެންފައިވަނީ 2010ވަނަ އަހަރުގެ ތެރޭގައެވެ.