އެމެރިކާއިން ތަޖުރިބާކުރަން ތާވަލުކޮށްފައިވާ އިންޓަކޮންޓިނެންޓަލް ބެލިސްޓިކް މިސައިލް، އައިސީބީއެމު ތަޖުރިބާނުކުރަން އެ ޤައުމުން ނިންމައިފިއެވެ.
އެއްބަރުން އަނެއް ބައްރަށް ޙަމަލާދިނުމުގެ ޤާބިލުކަން ލިބިފައިވާ ބެލިސްޓިކް މިސައިލެއް ތަޖުރިބާކުރަން އެމެރިކާއިން އެންމެ ފުރަތަމަ ތާވަލުކޮށްފައިވަނީ މާރިޗު މަހުގެ ދެވަނަ ދުވަހުއެވެ. ނަމަވެސް ވާދަވެރި ރަޝިޔާގެ ނިޔުކްލިޔަރ ފައުޖުތައް ތައްޔާރީ ޙާލަތަކަށް ގެނައުމުން އެމެރިކާއިންވަނީ ބެލިސްޓިކް މިސައިލެއް ތަޖުރިބާކުރުން ފަސްކޮށްފައެވެ. އަދި އެއީ އެ މަސައްކަތް ހުއްޓާލުން ނޫންކަމަށް އެ ޤައުމުން އޭރު ބުނެފައިވެއެވެ.
އެމެރިކާގެ ވައިގެ ސިފައިންގެ ފައުޖުން ބުނެފައިވަނީ އެ ޤައުމުން ތަޖުރިބާކާރަން މަސައްކަތްކުރި މިނެޓުމޭން 3ގެ ނަން ދީފައިވާ އައިސީބީއެމު ތަޖުރިބާނުކުރަން ނިންމީ ރަޝިޔާއާއެކު އެއްވެސް ނުތަނަވަސްކަމެއް އުފެދުނަ ނުދިނުމަށެވެ. އަދި އައިސީބީއެމެއް ދެން ތަޖުރިބާކާރުމަށް ނިންމާފައިވަނީ އަހަރުގެ ފަހުކޮޅުކަމަށްވެސް އެމެރިކާގެ ވައިގެ ސިފައިންގެ ފައުޖުން ބުނެފައިވެއެވެ.
މިނެޓުމޭން 3އަކީ ދުނިޔޭގައި އުފައްދާފައިވާ އެންމެ ބާރުގަދަ އައިސީބީއެމެވެ. ނިޔުކްލިޔަރ ހަތިޔާރު އުފުލުމުގެ ޤާބިލުކަން ލިބިފައިވާ މިނެޓުމޭން 3 ގަޑިއަކު 24،000 ކިލޯމީޓަރު ބާރުމިނުގައި 10،000 ކިލޯމީޓަރުގެ ރާސްތާއަކަށް ދަތުރުކުރެއެވެ. އެ މިސައިލުތައް ފޮނުވާލަނީ ބިމުއަޑީގައި ޤާއިމުކޮށްފައިވާ ޚާއްޞަ މަރުކަޒުތަކަކުންނެވެ.