ދުބާއީގައި ބާއްވާ "އިންޓަރނޭޝަނަލް ހޯލީ ޤުރްއާން ކޮމްޕެޓިޝަން 2022"ގައި، ރާއްޖޭ ތަމްސީލްކުރުމަށް އަލްހާފިޡް އަޙްމަދު ނަބީޙު ދުބާއީއަށް ފުރައިފިއެވެ.
މި މުބާރާތަކީ ބައިނަލްއަޤްވާމީ ފެންވަރެއްގައި ބާއްވާ މިފަދަ އެންމެ ބޮޑު މުބާރާތެވެ. މުބާރާތުގެ ކިޔެވުން ކުރިއަށްދާނީ ރަމަޟާންމަހުގެ 1 އިން 14 ވަނަ ދުވަހުގެ ނިޔަލަށެވެ.
މި މުބާރާތުގައި ބައިވެރިވުމަށް އުމުރުން 19 އަހަރުގެ ނަބީޙު ހޮވިފައިވަނީ ރާއްޖޭގެ ފަރާތުން މުބާރާތުގައި ބައިވެރިވާނެ ފަރާތެއް ހޯދުމަށް ކީރިތި ޤުރުއާނާ ބެހޭ މަރުކަޒުން ހުޅުވާލި ފުރުޞަތުގައި ބައިވެރިވި 3 ބޭފުޅުންގެ ތެރެއިންނެވެ.
އަލްޙާފިޡް އަޙްމަދު ނަބީޙްއަކީ ޚާއްޞަ އެހީއަށް ބޭނުންވާ ފަރާތެކެވެ. މުބާރާތުގައި ބައިވެރިވުމަށް ނަބީހު ދުބާއީއަށް ފުރިއިރު އިތުރު އެހީތެރިކަން ދިނުމުގެ ގޮތުން ނަބީހުގެ މަންމައާއި ދައްތަވެސް މި ދަތުރުގައި އޭނާއާއެކު ބައިވެރިވެއެވެ.
ކީރިތި ޤުރުއާން ހިތުދަސްކުރުމުގެ އިތުރުން، ޤުރުއާން ކިޔެވުމުގެ އެކިއެކި މުބާރާތްތަކުގައި ޤައުމީ ފެންވަރުގެ ގިނަ ކާމިޔާބީތަކެއް ނަބީޙު ވަނީ ޙާޞިލުކޮށްފައެވެ.