އޮންލައިންކޮށް ޒަކާތުގެ ފައިސާ ދައްކާ ފަރާތްތަކުން އެމީހަކު ބޭނުންވާ ރަށަކަށް ފައިސާ ޖަމާކުރުމުގެ އިންތިޒާމް މިއަހަރު ހަމަޖެހިފައިވާކަމަށް އިސްލާމިކް މިނިސްޓަރ ޑރ. އަޙްމަދު ޒާހިރު ވިދާޅުވެއްޖެއެވެ.
އިސްލާމިކް މިނިސްޓްރީއިން ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން އިސްލާމިކް މިނިސްޓަރ ޑރ. އަހްމަދު ޒާހިރު ވިދާޅުވީ މިއަހަރުގެ ފިތުރު ޒަކާތް ބަލައިގަތުމުގައި މުދަލާއި، ފައިސާއިންނާއި ކާބޯތަކެތިން ބަލައިގަންނާނެކަމަށެވެ. އެގޮތުން މިއަހަރުގެ ފިތުރު ޒަކާތް ދެއްކުމުގައި ގެނެވުނު ބަދަލުތަކާއި ގުޅިގެން ޒަކާތް ދެއްކުމުގައި ޒަކާތް ދައްކާ ފަރާތްތަކަށް އިތުރު ފަސޭހަތަކެއް ލިބިގެންދާނެކަމަށް މިނިސްޓަރ ފާހަގަކުރެއްވިއެވެ.
"މިސާލަކަށް ވަކި ރަށެއްގެ ބޭފުޅުން މާލޭގަ ހުންނަވާފައި އެބޭފުޅަކު ބޭނުންވަނީ އެބޭފުޅެއްގެ ރަށަށް ފިތުރު ޒަކާތް ދައްކަން. އެގޮތަށް އެ ރަށެއް އިޙްތިޔާރު ކުރެވޭ ގޮތަށް އަޅުގަނޑުމެން މި އިންތިޒާމް މިއަހަރު ހަމަޖައްސަނީ. އެހެންވީމަ އަޅުގަނޑުމެން އެރަކަށް ދައްކާ ފައިސާ އެރަށަކަށް ފޯރުކޮށްދޭނަން. އެހެންވީމަ މީއީ އަޅުގަނޑުމެންނަށް ގެނެވުނު ހެޔޮ ބަދަލެއް" މިނިސްޓަރ ޒާހިރު ވިދާޅުވިއެވެ.
އިސްލާމިކް މިނިސްޓްރީން ވިދާޅުވީ މިވަގުތު ރާއްޖޭގައި ފަޤީރުންގެ ގޮތުގައި ތިބީ 9041 މީހުން ކަމަށެވެ. އޭގެ ތެރޭގައި މާލޭގެ ދަފްތަރުގައި 1796 މީހަކާއި އަތޮޅުތަކުން 7245 މީހުން ފަޤީރުންގެ ގޮތުގައި އެބަތިބިކަމަށް މިނިސްޓްރީން ބުނެއެވެ. މީގެ އިތުރުން މިދިޔަ އަހަރު 45 ރަށެއްގައި އެއްވެސް ފަޤީރަކު ނެތްއިރު މިއަހަރު 42 ރަށެއްގައި އެއްވެސް ފަޤީރެއް ނެތްކަމަށް މިނިސްޓްރީން ބުނެއެވެ.
މީގެ ކުރީގެ އަހަރުތަކުގައި ފިތުރު ޒަކާތުގެ ފައިސާ ބަލައިގަތުމުގައި ކޮންމެ ރަށަކަށް ކަނޑައަޅާފައިވާ ވަކި މިންވަރެއް ދައްކަން ޖެހެއެވެ. ނަމަވެސް މިއަހަރު ގެނައި ބަދަލުތަކާއެކު ފިތުރު ޒަކާތް ދައްކަން ކަނޑައަޅާ މިންވަރަކީ، އެއީ ރާއްޖޭގެ ހުރިހާ ރަށެއްގައި ވެސް ބަލައިގަންނަ މިންވަރުގެ ގޮތުގައި ވަނީ ކަނޑައަޅާފައެވެ.
ޒަކާތުގެ ގޮތުގައި ދައްކަންޖެހޭ މިންވަރު:
- އާދައިގެ ހަނޑުލުންނަމަ 12 ރުފިޔާ
- ތައިލެންޑް ހުދު ހަނޑުލުންނަމަ 77 ރުފިޔާ
- ބާސްމަތީ ހަނޑުލުގެ އާދައިގެ ހަނޑޫނަމަ 76 ރުފިޔާ
- ބާސްމަތީ ހަނޑުލުގެ މޮޅު ހަނޑޫނަމަ 90 ރުފިޔާ
- ބާސްމަތީ ހަނޑުލުގެ އެންމެ މޮޅު ހަނޑޫނަމަ 132 ރުފިޔާ
- ރަތް ހަނޑުލުންނަމަ 72 ރުފިޔާ
- އާދައިގެ ފުށުންނަމަ 12 ރުފިޔާ
- އާޓާ ފުށުންނަމަ 75 ރުފިޔާ
މިއަހަރުވެސް ފިތުރު ޒަކާތުގެ ފައިސާ ދެއްކުމުގައި ރާއްޖޭގެ ކޮންމެ ތަނެއްގައި ހުރެވެސް ފަސޭހަކަމާއެކު އޮންލައިންކޮށް ޒަކާތްދެއްކޭނެ އިންތިޒާމް އިސްލާމިކް މިނިސްޓްރީން ވަނީ ހަމަޖައްސާފައެވެ. އެގޮތުން އެސްއެމްއެސް މެދުވެރިކޮށް ބެންކް އޮފް މޯލްޑިވްސް، މޯލްޑިވްސް އިސްލާމިކް ބޭންކް، ދިރާގު، އުރީދޫ އަދި ފަހިޕޭ މެދުވެރިކޮށް ޒަކާތް ދެއްކޭނެ އިންތިޒާމް ވަނީ ހަމަޖައްސާފައެވެ. މީގެއިތުރުން ފިތުރު ޒަކާތް ބަލައިގަތުން ހަމަޖެހިފައިވަނީ އިސްލާމީ މަރުކަޒުގެ ހޯލުންނާއި އަތުޅޮ ތެރޭގައި އެރަށެއްގެ ރަށު ކައުންސިލުންނެވެ.
ފިތުރު ޒަކާތް ފައިސާއިން ބަލައިގަތުން އޮންނާނީ ރަމަޞާންމަހުގެ 2 ވަނަ ދުވަހުން ފެށިގެން ކަމަށް މިނިސްޓްރީން ބުނެއެވެ. އަދި ގޮވާމުގެ ބާވަތްތަކުން ފިތުރު ޒަކާތް ބަލައިގަންނާނީ ރޯދަމަހުގެ ފަހު ދިހައިގައިކަމަށްވެސް މިނިސްޓްރީއިން ބުނެއެވެ.