"ފޯރޓްރެސް އޮފް މާލެ" ނުވަތަ ދިވެހި ނަމުންނަމަ "މާލޭ ކިއްލާ"ގެ ނަމުގައި ޙާއްސަ އާޓް ގެލަރީއެއް ބާއްވައިފިއެވެ.
ކްރޮސްރޯޑްސް މޯލްޑިވްސްގައި ކުރިއަށްދިޔަ މި އާޓް ގެލެރީއަކީ ކުރެހުންތެރިޔާ އައިމިނަތު ޝިމްހާ ޝަކީބްގެ ފަންނުވެރި މަސައްކަތްތައް ދައްކުވައިދޭ ގެލެރީއެކެވެ.
"މާލޭ ކިއްލާ" ކުރެހުންތަކަކީ 1800ގެ އަހަރުތަކުގައި ރާއްޖޭގެ ވެރިރަށް ދައްކުވައިދޭ ގޮތަށް ތައްޔާރުކޮށްފައިވާ ކުރެހުންތަކެކެވެ. އެގޮތުން މިކުރެހުންތަކަކީ މާލޭގެ ތާރީޙާއި ގުޅޭގޮތުން އިހުޒަމާނުގައި ލިބެންއޮތް މައުލޫމާތެއްގެ މައްޗަށް ބިނާކޮށް ކުރަހާފައިވާ ކުރެހުންތަކެކެވެ. މިކުރެހުންތަކުގައި އޭރު މާލޭގައި ދިރިއުޅުނު ދިވެހިންގެ އާދަކާދައޮތްގޮތާއި އެޒަމާނުގައި މާލޭގައި ހުރި ގަނޑުވަރުތަކާއި އާސާރީ ތަންތަން ދައްކުވައިދެއެވެ.
ޖުމްލަ 25 ކުރެހުން ހިމެނޭ މި އާޓް ގެލެރީގައި ހުރި ހުރިހާ ކުރެހުމަކީވެސް ފެންކުލައިން ކުރަހާފައިވާ ކުރެހުންތަކެވެ. އެއިން ކޮންމެ ކުރެހުމަކުންވެސް ދޭހަކޮށްދެނީ މުޅިން ތަފާތު ވާހަކައެކެވެ.
ބޮޑު ޕްރޮޖެކްޓެއްގެ ގޮތުގައި ކުރިއަށްގެންދިޔަ މި އާޓް ގެލެރީއަކީ ކުރީގެ ރައީސް މުހައްމަދު ނަޝީދާއި ގުޅިގެން ކުރިއަށް ގެންދިޔަ ޕްރޮޖެކްޓެކެވެ. ރައީސް ނަޝީދު ވަނީ ގެލަރީގައި ބައިވެރިވެވަޑައިގެން ކުރެހުންތައް ބައްލަވާލައްވާފައެވެ. އަދި އެމަނިކުފާނު ވަނީ ގެލެރީގައި ބައިވެރިވި އެންމެހާ ފަރާތްތަކަށް، ކުރެހުންތަކުގެ ތާރީޙާއި ގުޅިގެން ޕްރެޒެންޓޭޝަނެއް ހުށަހަޅުއްވާފައެވެ.
ކުރެހުންތަކާއި ގުޅޭގޮތުން ވާހަކަދައްކަމުން ޝިމްހާ ބުނީ މިކަމުގައި އެންމެ ބޮޑު އެއްބާރުލުމެއް ލިބުނީ ރައީސް ނަޝީދުގެ ފަރާތުންކަމަށެވެ. އަދި މިޕްރޮޖެކްޓްގެ މަސައްކަތްތަކަށް ގިނަ ގޮންޖެހުންތަކެއް ދިމާވި ނަމަވެސް ގުޅައިގެންވެސް ރައީސް ނަޝީދު މިކަމުގައި އެހީތެރިވެވަޑައިގެންނެވިކަމަށް ޝިމްހާ ބުނިއެވެ.
"ފުރަތަމަ ދިމާވި ޗެލެންޖަކީ އަޅުގަނޑު މިކަން ފެށިއިރު މިކަމާގުޅޭ އެއްވެސް މައުލޫމާތެއް ނެތް އެކަމަކު ޓީމްގެ އެންމެންވެސް ވަރަށް އެހީތެރިވި. ދެން ދެވަނަކަމަކަށް އެންމެ އުނދަގޫވި މެޓީރިއަލްސް ހޯދަން. އެކަމުގެ ސަބަބުން ޕެއިންޓިންގްސްތައް އޭ3 ސައިޒްއަށް ކުޑަކޮށްލަން ޖެހުނު. އެކަމަކު އެއަށްވުރެއް ބޮޑެތި ޕޭޕަރސް ހުރިނަމަ އަޅުގަނޑުމެން ތަންކޮޅެއް ބޮޑުކޮށް ޕެއިންޓްކުރާނީ" ޝިމްހާ ބުނެފައިވެއެވެ.
ޝިމްހާ ބުނީ އޭނާގެ މި ކުރެހުންތަކަށް ބެލުންތެރިންގެ ވަރަށް ބޮޑު ތަރުހީބެއް ލިބިގެންދިޔައެވެ. ހާއްސަގޮތެއްގައި އާއިލާ މީހުންނާއި އެކުވެރި ރަހުމަތްތެރިންގެ ފަރާތުން ލިބޭ އެއްބާރުލުން ޝިމްހާ ވަނީ އުފަލާއެކު ފާހަގަކޮށްފައެވެ.
"ފޯރޓްރެސް އޮފް މާލެ" ޕެއިންޓިންގއަކީ ވަރަށް މަދު ވަސީލަތެއް ބޭނުންކޮށްގެން 1800 އަހަރުގެ ތެރޭގައި މާލެ ތަސައްވުރުކޮށްގެން ކުރެވުނު ވަރަށް ބޮޑު އަދި އަގުހުރި މަސައްކަތްތަކެކެވެ.