މިނިސްޓަރ އޮފް ކޮމިއުނިކޭޝަން، ސައިންސް އެންޑް ޓެކްނޮލޮޖީގެ މަގާމުގައި މުހައްމަދު މަލީހު ހުންނެވިއިރު އޭނާގެ ކޮޓަރިކޮޅާއި އިމާރާތުގެ ބައެއް ތަންތަނަށް ބަދަލު ގެނައުމަށް 7 ލައްކައަށްވުރެ ގިނަ ރުފިޔާ ހަރަދުކުރައްވާފައިވާކަން އޮޑިޓަރ ޖެނަރަލް ހާމަކުރައްވައިފިއެވެ.
އޮޑިޓަރ ޖެނެރަލް މިކަން ހާމަކުރައްވާފައިވަނީ މިނިސްޓްރީ އޮފް ކޮމިއުނިކޭޝަން، ސައިންސް އެންޑް ޓެކްނޮލޮޖީގެ 2019 ވަނަ އަހަރުގެ އޮޑިޓް ރިޕޯޓުގައެވެ.
ޢޮޑިޓަރ ޖެނެރަލްގެ ރިޕޯޓުގައި ވަނީ މިނިސްޓްރީ އޮފް ކޮމިއުނިކޭޝަން، ސައިންސް އެންޑް ޓެކްނޮލޮޖީ މިނިސްޓްރީ ހިންގާ އިމާރާތުގެ ބީ. ބްލޮކް ރިލޮކޭޓްކުރުމުގެ މަސައްކަތުން ފާހަގަކުރެވުނު ކަންތައްތައް ފާހަގަކުރައްވާފައެވެ. އެގޮތުން މިނިސްޓަރުގެ ކޮޓަރިކޮޅާއި، މިނިސްޓްރީ ހިންގާ އިމާރާތުގެ ބްލޮކްބީ ރިލޮކޭޓްކުރުމަށް، ހަތް ލައްކަ ނުވަދިހަ ފަސް ހާސް ރުފިޔާއަށް، އަމިއްލަފަރާތަކާއި 15 ސެޕްޓެމްބަރު 2019 ވަނަ ދުވަހު ޙަވާލުކޮށްފައިވާއިރު ބައެއްކަންކަން ދައުލަތުގެ މާލިއްޔަތުގެ ގަވާއިދާ ޚިލާފަށްކޮށްފައިވާކަމަށް އޮޑިޓް ރިޕޯޓުގައިވެއެވެ.
އޭގެ ތެރޭގައި މިނިސްޓަރގެ ކޮޓަރިކޮޅުގެ އިންޓީރިއަރ ޑިޒައިނެއް ތައްޔާރުކޮށް އެ ޑިޒައިނާ އެއްގޮތަށް ބްލޮކްބީ ރިލޮކޭޓް ކުރުމަށް އެކުލަވާލި އެ މަސައްކަތުގެ އެއްބަސްވުމުގައި ބުނާ ތާރީހަށް މަސައްކަތް ނިމިފައިނުވާއިރު، މަސައްކަތް ލަސްވުމުގެ ސަބަބުން ލިކުއިޑޭޓެޑް ޑެމޭޖަސް ގޮތުގައި އުނިކުރަންޖެހޭ ލައްކައަކަށްވުރެ ގިނަ ރުފިޔާ މަސައްކަތުގެ އަގުން އުނިކޮށްފައިނުވާކަން އޮޑިޓް ރިޕޯޓްގައި ފާހަގަކޮށްފައިވެއެވެ. އަދި މިމަސައްކަތާއި ގުޅިގެން ހުށަހަޅާފައިވާ ބިލްތަކަށް ފައިސާ ދައްކާފައިވާއިރު، ރިޓެންޝަން ފައިސާ އުނިކޮށްފައި ނުވާކަންވެސް ފާހަގަކޮށްފައިވެއެވެ.
އޮޑިޓް ރިޕޯޓްގައި ވަނީ މިނިސްޓްރީ އޮފް ކޮމިއުނިކޭޝަން، ސައިންސް އެންޑް ޓެކްނޮލޮޖީގެ ދަށުން ހިނގަމުންދާ ނޭޝަނަލް ސެންޓަރ ނޭޝަނަލް ސެންޓަރ ފޮރ އިންފޮމޭޝަން ޓެކްނޮލޮޖީގެ ހަރުމުދަލާއި ހަރުމުދަލުގެ ރެކޯޑުތައް ގަވާއިދުގައި ބަޔާންކޮށްފައިވާ ގޮތުގެމަތިން ބަލަހައްޓާފައި ނުވާކަން ފާހަގަކޮށްފައިވެއެވެ. އަދި މިކަމުގެ ސަބަބުން މިނިސްޓްރީގެ 2019 ވަނަ އަހަރުގެ "މިލްކިއްޔާތާއި މާލީ ޒިންމާތަކުގެ ބަޔާން"ގައި، ހަރުމުދަލުގެ އަގުގެ ގޮތުގައި ހިމަނާފައިވާ ޖުމްލަ އަގު ކަމުގައިވާ 164 މިލިއަނަށްވުރެ ގިނަ ރުފިޔާއަކީ އެމިނިސްޓްރީގެ ބެލުމުގެ ދަށުގައި ހުރި ހަރުމުދަލުގެ ޞައްޙަ އަގުކަން ކަށަވަރު ކުރެވެން ނެތްކަން އޮޑިޓް ރިޕޯޓްގައި ފާހަގަކޮށްފައިވެއެވެ.
މިމައްސަލަތަކުގެ އިތުރުންވެސް މިނިސްޓްރީ އޮފް ކޮމިއުނިކޭޝަން، ސައިންސް އެންޑް ޓެކްނޮލޮޖީގެ 2019 ވަނަ އަހަރުގެ އޮޑިޓް ރިޕޯޓުގައި ބައެއް އިތުރު މައްސަލަތަކާއި، އެކަންކަން އިސްލާހުކުރަން ދެއްވާ ލަފާތައްވެސް ހިމެނެއެވެ.