ދެމެހެއްޓެނެވި މުސްތަޤްބަލަކަށްޓަކައި އެ މުޖުތަމަޢެއްގެ ހުރިހާ ދާއިރާއެއްގައި މިންތީގެ ހަމަހަމަކަން އޮތުން ލާޒިމް: ފަޒްނާ
ރައްކާތެރި ދުޅަހެޔޮ ދެމެހެއްޓެނެވި މުސްތަޤްބަލަކަށްޓަކައި އެ މުޖުތަމަޢެއްގެ ހުރިހާ ދާއިރާއެއްގައި މިންތީގެ ހަމަހަމަކަން އޮތުން ލާޒިމުކަމުގައި ރައީސުލްޖުމްހޫރިއްޔާގެ އަނބިކަނބަލުން ފަޒްނާ އަޙްމަދު ވިދާޅުވެއްޖެއެވެ.
ރައީސުލްޖުމްހޫރިއްޔާގެ އަނބިކަނބަލުން މިހެން ވިދާޅުވީ ބައިނަލްއަޤްވާމީ އަންހެނުންގެ ދުވަސް ފާހަގަކުރުމަށް މިރޭ ބޭއްވި ރަސްމީ ޖަލްސާގައި ވާހަކަފުޅު ދައްކަވަމުންނެވެ.
މިއަހަރުގެ ބައިނަލްއަޤްވާމީ އަންހެނުންގެ ދުވަސް ފާހަގަކުރުމުގެ ގޮތުން ރޭ ބޭއްވި ޖަލްސާ ޝަރަފުވެރިކޮށްދެއްވީ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙެވެ. އެމަނިކުފާނުގެ އަރިހުގައި އަނބިކަނބަލުން ފަޒްނާ އަޙްމަދާއި ރައީސުލްޖުމްހޫރިއްޔާގެ ނައިބު ފައިޞަލް ނަސީމު ބައިވެރިވެވަޑައިގެންނެވިއެވެ.
މި ޖަލްސާގައި ވާހަކަފުޅު ދައްކަވަމުން ރައީސުލްޖުމްހޫރިއްޔާގެ އަނބިކަނބަލުން ވަނީ 2019 ވަނަ އަހަރުން ފެށިގެން ކޮންމެ އަހަރެއްގެ އަންހެނުންގެ ދުވަހުގެ ޝިއާރުގެ މައްޗަށް އަލިއަޅުވާލައްވައި މި ހުރިހާ ޝިއާރުތަކުގެ ވެސް މައިގަނޑު އަމާޒަކީ އެއް ކަންތައްތަކެއްކަމަށާއި އެއީ ދެމެހެއްޓެނެވި ތަރައްގީއަށްޓަކާ އަންހެނުން ކުރަމުންގެންދާ އަގުހުރި، ބުރަ މަސައްކަތްތަކުގެ އަގު ވަޒަންކުރުންކަން ފާހަގަކުރައްވާފައެވެ.
މުޖްތަމަޢުގައި އަންހެނުންނަށް ހަމަހަމަ ފުރުޞަތުތަކެއް ލިބުމަށް ހުރި ހުރަސްތަކާއި އެފަދަ ބައެއް މިސާލުތައް ފާހަގަކުރައްވަމުން ރައީސުލްޖުމްހޫރިއްޔާގެ އަނބިކަނބަލުން ވިދާޅުވީ ފިރިހެންމީހާ ގޭގެ ޒިންމާތަކުގައި ހިއްސާވާނަމަ ހަމަހަމަކަމަށް ހުރި ހުރަސްތައް ނައްތާލެވޭނެކަމަށާއި އަދި އަންހެން މީހާ އުފުލަން ޖެހޭ ބުރަ ޒިންމާތައް އިންސާފުވެރިކަމާއެކު ކުޑަކުރެވޭނެކަމުގައެވެ.
ނިންމުންތައް ނިންމުމުގާ އަންހެނުންގެ ފުރިހަމަ ބައިވެރިވުން އޮންނަންޖެހޭ މައިގަނޑު ސަބަބުގެ މައްޗަށް އަލިއަޅުވާލައްވައި އެކަމަނާ ވިދާޅުވީ އޭގެ އެންމެ މުހިންމު ބޭނުމަކީ ފިރިހެނެއްގެ ނަޒަރުން ވިސްނިފައިނުވާ ތަޖުރިބާ ކޮށްފައިނުވާ އެތައްކަމެއް އަންހެނެއްގެ ނަޒަރުން ވިސްނައި، ކަންކަން ނިންމުމުގައި އެކަންކަން ޙިއްޞާވެގެން ދިއުންކަމުގައެވެ.
ހަމައެހެންމެ، އަންހެންވަންތަކަން މަތީތިބެ މުޖުތަމަޢުގެ ތަރައްޤީގައި ބަސްބުނުމަށް ޖާގަދިނުމަށާއި އަގު ވަޒަން ކުރުމާއި އަދި ވަޒީފާ އަދާކުރަމުން ގޭގައި ޒިންމާއަދާކުރާއިރު އެޒިންމާތައް ނެގުމުގާ ފިރިހެނުންގެ ހިއްސާވުމަށް ކުރެވޭ ވަކާލާތުތަކެއްކަން ފާހަގަކުރެއްވިއެވެ.
ރޭގެ ޖަލްސާގައި ރެހެންދި އެވޯޑް 2022 ހާސިލުކުރި ފަރާތްތަކަށް އެވޯޑް ހަވާލުކޮށްދެއްވުންވެސް ކުރިޔަށްދިޔައެވެ. އެގޮތުން މިއަހަރު ރެހެންދި އެވޯޑް ހާސިލުކުރި 9 ފަރާތާ އެވޯޑް ހަވާލުކޮށްދެއްވީ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙެވެ. އަދި މި އެވޯޑް ހާސިލުކުރެއްވި ފަރާތްތަކަށް ބްރޫޗް ހަވާލުކޮށްދެއްވީ ރައީސުލްޖުމްހޫރިއްޔާގެ އަނބިކަނބަލުން ފަޒްނާ އަޙްމަދެވެ.
މި އަހަރު ރެެހެންދި އެވޯޑު ލިބުނު ފަރާތްތައް:
1. އާންމު ފަރުދުންގެ ތެރެއިން އަންހެނުންގެ ތަރައްގީ އަށް މަސައްކަތް ކުރާ ފިރިހެނުންނާއި އަންހެނުންގެ ދާއިރާ: ނަފީސާ އަލީ
2. ސިއްހީ ދާއިރާ: ޑރ. ފާތިމަތު މުފްލިހާ
3. ސިއްހީ ދާއިރާ: ލެފްޓިނެންޓް ފިރުޝާނާ ތައުފީގު
4. ފަންނުވެރިކަމާއި ސަގާފަތާއި ތަރިކައިގެ ދާއިރާއިން: އިއްޒަތު އަހުމަދު ނިޒާރު
5. ކުދި އަދި މެދު ފަންތީގެ ވިޔަފާރީގެ ދާއިރާއިން: އައިޝަތު އިބްރާހިމް
6. އިޖުތިމާއީ ދާއިރާއިން: ދިމްނާ ފާކިރު
7. ހަބަރާއި މައުލޫމާތު ފެތުރުމުގެ ދާއިރާއިން: ޝިމްލާ އަހުމަދު
8. އަދާކުރާ ވަޒީފާގެ ގޮތުން އޮފީހަށް ނުވަތަ ދާއިރާއަށް ކޮށްފައިވާ ހިދުމަތުގެ ދާއިރާއިން: ފާތިމަތު ޖަބީން
9. ވަޒީފާދޭ ފަރާތްތައް ނުވަތަ މުއައްސަސާތަކުގެ ދާއިރާއިން: އެމްޕީއެލް
ރެހެންދި އެވޯޑަކީ ޤައުމީ ޚިދުމަތުގައި އެކިއެކި ދާއިރާއިން އަންހެނުން ކުރާ މަސައްކަތްތަކާއި ރާއްޖޭގެ ޤައުމީ ތަރައްޤީއާ ލާބަޔާ މަންފާއަށް އަދި ދިވެހި މުޖުތަމަޢު ބިނާކުރުމަށް އަންހެނުން އަދާކުރާ ދައުރު ފާހަގަކޮށް އަގުވަޒަންކުރުމުގެ ގޮތުން ރައީސުލްޖުމްހޫރިއްޔާ ދެއްވާ އެވޯޑެކެވެ. 2014 ވަނަ އަހަރުން ފެށިގެން ކޮންމެ އަހަރަކު ދެމުން އަންނަ މި އެވޯޑް، ފާއިތުވި 9 އަހަރުގެ ތެރޭގައި 55 ފަރާތަކުން ހާސިލުކޮށްފައިވެއެވެ.
މި ޖަލްސާގަގައި ރައީސުލްޖުމްހޫރިއްޔާގެ ނައިބު ފައިޞަލް ނަސީމް ވަނީ ޖެންޑަރ އީކުއަލިޓީ އެކްޝަން ޕްލޭންވެސް އިފްތިތާޙް ކޮށްދެއްވާފައެވެ.