ރަޝިޔާގެ އިދިކޮޅު ސިޔާސީވެރިޔާ އެލެކްސީ ނަވާލްނީ އިތުރު ނުވަ އަހަރަށް ޖަލަށްލުމަށް ޙުކުމުކޮށްފިއެވެ.
ރަޝިޔާގެ ރައީސް ވުލަޑުމީރް ޕުޓިންގެ އެންމެ ބޮޑު ސިޔާސީ ވާދަވެރިޔާކަމަށްވާ ނަވާލްނީ އިތުރު ނުވަ އަހަރަށް ޖަލަށްލުމަށް ޙުކުމުކޮށްފައިވަނީ މަކަރާއި ޙީލަތްތެރި ޢަމަލުތައް ހިންގިކަމަށް ސާބިތުވުމުންނާއި ކޯޓުގެ ޙުރުމަތް ކެނޑުމުންނެވެ. ނަވާލްނީގެ މައްޗަށް ކޮށްފައިވާ ދެ އަހަރާއި އަށް މަސްދުވަހުގެ ޙުކުމެއް ތަންފީޒުކުރެއްވުމަށް އޭނާ މިހާރުވެސް ހުންނެވީ ޖަލުގައެވެ. ދަޢުލަތުގެ ވަކީލުން މަސައްކަތްކޮށްފައިވަނީ އިތުރު 13 އަހަރަށް ނަވާލްނީ ޖަލުގައި ބަންދުކުރުމަށެވެ. ކޯޓުން ކޮށްފައިވާ ނުވަ އަހަރުދުވަހުގެ ޖަލު ޙުކުމު އޭނާއަށް އިސްތިޢުނާފު ކުރެއްވޭނެއެވެ.
ޢުމުރުފުޅުން 45 އަހަރުގެ ނަވާލްނީގެ މައްޗަށް ކޮށްފައިވާ އެންމެ ބޮޑު ދަޢުވާއަކީ އޭނާ އުފައްދާފައިވާ ފަސާދައާއި ޚިޔާނާތާ ދެކޮޅަށް މަސައްކަތްކުރާ ޖަމުޢިއްޔާއަށް ލިބުނު ފައިސާގެ ބޮޑު ބައެއް އޭނާގެ އަމިއްލަފުޅު ކަންކަމަށް ޚަރަދުކުރެއްވުމެވެ. އެ ދަޢުވާ އޭނާގެ މައްޗަށް ސާބިތުވުމުން 11،500 އެމެރިކާ ޑޮލަރުން އޭނާވަނީ ޖޫރިމަނާވެސްކޮށްފައެވެ. ކޯޓުގެ ޙުރުމަތް އޭނާ ކެނޑުއްވިކަމަށް ޙުކުމުކޮށްފައިވަނީ މައްސަލަ ބެއްލެވި ޤާޒީގެ އިތުރުން 91 އަހަރުގެ މުސްކުޅިއަކަށް ބޭއަދަބީ ބަހުން މުޙާތަބުކުރެއްވުމުންނެވެ.