ޔޫކްރެއިނަށް ޙަމަލާދޭން ފެށުމުން ރަޝިޔާއާ ދެކޮޅަށް ހަރުކަށި އިޤްތިޞާދީ ދަތިކުރުމުގެ ފިޔަވަޅުތައް އަޅަން އުނދަގޫވަނީ ހަމައެކަނި އިންޑިޔާއަށްކަމަށް އެމެރިކާގެ ރައީސް ޖޯ ބައިޑަން ވިދާޅުވެއްޖެއެވެ.
ވިޔަފާރިވެރިންގެ ބައްދަލުވުމެއްގައި ވާހަކަދައްކަވަމުން ބައިޑަން ވިދާޅުވީ ރަޝިޔާއާ ދެކޮޅަށް ދަތިކުރުމުގެ ފިޔަވަޅުތައް އެޅުމުގައި ވިލާތުގެ އިއްތިޙާދުންނާއި ހުޅަނގުގެ އަސްކަރީ އިއްތިޙާދު، ނޭޓޯއިންނާއި ކުއަޑުރިލެޓަރަލް ސެކިޔުރިޓީ ޑައިލޮގު، ކުއަޑުގެ މެންބަރު ޤައުމުތަކުން އެކަތިގަނޑެއްގެ ގޮތުގައި މަސައްކަތްކުރަމުންދާކަމަށެވެ. ނަމަވެސް ކުއަޑުގައި ހިމެނޭ އިންޑިޔާއިން ރަޝިޔާއާ ދެކޮޅަށް ދަތިކުރުމުގެ ފިޔަވަޅުތައް އަޅަން އުނދަގޫކަމަށް ބައިޑަން ފާހަގަކުރެއްވިއެވެ. އޭނާ ވިދާޅުވީ ރަޝިޔާއާ ދެކޮޅަށް ދަތިކުރުމުގެ ފިޔަވަޅުތައް އެޅުމަށް އިންޑިޔާއިން ފަސްޖެހުނު ނަމަވެސް ކުއަޑުގައި ދެން ހިމެނޭ ޖަޕާނާއި އޮސްޓުރޭލިޔާއިން ވަރުގަދަ ރައްދެއް ދީފައިވާކަމަށެވެ.
އިންޑިޔާގެ ބޮޑުވަޒީރު ނަރެންދުރަ މޯދީއާއި އޮސްޓުރޭލިޔާގެ ބޮޑުވަޒީރު ސުކޮޓު މޮރިސަންނާ ދެމެދު ކުރެއްވި މަޝްވަރާތަކަށްފަހު އިންޑިޔާގެ ޚާރިޖީ ވުޒާރާއިން ބުނެފައިވަނީ ރަޝިޔާއާ ދެކޮޅަށް ދަތިކުރުމުގެ ފިޔަވަޅުތައް އެޅުމުގައި އިންޑިޔާއިން ޢަމަލުކުރާ ގޮތާއި އެފަދަ ފިޔަވަޅެއް އަޅައިފިނަމަ އިންޑިޔާއަށް ކުރާނެ އަސަރާއި އެ ޤައުމަށް ކުރިމަތިވާނެ ހުރަސްތައް އޮސްޓުރޭލިޔާއަށް ސާފުކޮށްދީފައިވާނެކަމަށެވެ. ރަޝިޔާއިން ޔޫކްރެއިނަށް ޙަމަލާދިނުން ހުއްޓާލުމަށް އިންޑިޔާއިން ގޮވާލި ނަމަވެސް އެ ޤައުމުން އދގެ ސަލާމަތީ މަޖިލީހުންނާއި އދގެ ޢާއްމު މަޖިލީހުގައި ރަޝިޔާއާ ދެކޮޅަށް ވޯޓުދީފައެއް ނުވެއެވެ. ފާއިތުވި އަހަރުތަކުގެ ތެރޭގައި އިންޑިޔާއާއި ރަޝިޔާއާ ދެމެދުވަނީ އިޤްތިޞާދީގޮތުންނާއި އަސްކަރީގޮތުން ގާތްގުޅުމެއް އުފެދިފައެވެ.
ރަޝިޔާއާ ދެކޮޅަށް ދަތިކުރުމުގެ ފިޔަވަޅުތައް އެޅުމުގައި އިންޑިޔާއާއި ޗައިނާއިން ގެންގުޅެނީ އެއްގޮތް ސިޔާސަތުތަކެކެވެ. އެމެރިކާއިން ބޭނުންވާ ގޮތަށް ނޭނބުރޭނެ ގިނަ ޤައުމުތަކެއް އޮތްކަން ޤަބޫލުކުރަން ޖެހޭކަމަށާއި ރަޝިޔާއާއި ޗައިނާއާއި އިންޑިޔާއާއި ބުރެޒިލްފަދަ ބޮޑެތި އިޤްތިޞާދީ ބާރުތަކަކީ ހުޅަނގަށް ބަރޯސާނުވެ އުޅެވޭވަރުގެ ޤައުމުތައްކަމަށް ރަޝިޔާގެ ޚާރިޖީ ވަޒީރު ސަރްގައި ލަވްރޯފް މީގެ ކުރިންވަނީ ފާހަގަކުރައްވައިފައެވެ.