މާލޭގައި ފުލުހުން ހިންގި މަސްތުވާތަކެތީގެ އޮޕަރޭޝަނެއްގައި ގިނަ އަދަދެއްގެ މަސްތުވާތަކެތި އަތުލައިގެންފިއެވެ.
މި އޮޕަރޭޝަނަކީ ސޯސަން މަގުގައި މިރޭ 7:30 ހާއިރުން ފެށިގެން ފުލުހުން ހިންގަމުންދާ ޚާއްސަ އޮޕަރޭޝަނެކެވެ.
މައުލޫމާތު ލިބިފައިވާ ގޮތުގައި ފުލުހުން ހަރަކާތްތެރިވެފައި ވަނީ ޕިކަޕެއްގައި ގިނަ އަދަދެއްގެ ފޮށިތަކާއިއެކު މަސްތުވާތެކެތި އުފުލާކަމުގެ މައުލޫމާތު ލިބިގެނެވެ. އަދި ފުލުހުން ހިފެހެއްޓި ޕިކަޕުގައި ގިނަ ފޮށިތަކެއްް ހުރިކަމަށްވެސް އެ ސަރަހައްދުގައި ހުރި ޕީއެސްއެމް ނިއުސް ޓީމުގެ ނޫސްވެރިޔަކު މައުލޫމާތު ދިނެވެ.
މި އޮޕަރޭޝަނުގައި 4 މީހަކު ފުލުހުންގެ ބެލުމުގެ ދަށަށް ގެންދިޔަ މަންޒަރު ފެނިފައިވާއިރު، އޭގެތެރޭގައި ހިމެނެނީ 2 ދިވެހިންނާއި، 2 ބިދޭސީންއެވެ.
މިކަމާއި ގުޅިގެން ފުލުހުން ހަމައެކަނި ބުނީ މަސްތުވާތަކެތީގެ ބޮޑު އޮޕަރޭޝަނެއް ކުރިއަށްދާކަމަށެވެ. އިތުރު މައުލޫމާތު ހާމަކުރާނީ ފަހުންކަމަށް ފުލުހުން ވިދާޅުވެއެވެ.