ޔޫއެންއޯޑީސީގެ ގްލޯބަލް މެރީޓައިމް ކްރައިމް ޕްރޮގްރާމުގެ ފަރާތުން ރާއްޖެއާއި ލަންކާގެ ޕްރިޒަން އޮފިސަރުންނަށް ޚާއްސަ ޓްރެއިނިންގ ޕްރޮގްރާމެއް ފަށައިފިއެވެ.
"އެކްސެލިންގ ބިޔޯންޑް އެމަރޖިންގ ޗެލެންޖަސް – ކަރެކްޝަންސް އާފްޓަރ ގްލޯބަލް ޕެންޑެމިކް"ގެ ނަމުގައި ކުރިއަށްގެންދާ މި ޓްރެއިނިންގ ޕްރޮގްރާމް 5 ދުވަހަށް ކުރިއަށްގެންދިޔުމަށް ވަނީ ހަމަޖެހިފައެވެ.
ޔުނައިޓެޑް ނޭޝަންސް އޮފިސް އޮން ޑްރަގްސް އެންޑް ކްރައިމް (ޔޫއެންއޯޑީސީ)ގެ ގްލޯބަލް މެރީޓައިމް ކްރައިމް ޕްރޮގްރާމް (ޖީއެމްސީޕީ) އިން ސްރީ ލަންކާގެ ޕްރިޒަން އޮފިސަރުންނަށާއި މޯލްޑިވްސް ކަރެކްޝަނަލް ސަރވިސްގެ ޕްރިޒަން އޮފިސަރުންނަށް ހިންގާ މި ތަމްރީން ޕްރޮގްރާމް ކުރިއަށްގެންދަނީ މާފުށީ ޖަލުގައެވެ.
ކަރެކްޝަނަލް ސަރވިސްއިން ވިދާޅުވީ މި ތަމްރީން ޕްރޮގްރާމަކީ ޔޫއެންގެ “މިނިމަމް ސްޓޭންޑަޑް ފޯ ދަ ޓްރީޓްމަންޓް އޮފް ޕްރިޒަނަސް – ދަ ނެލްސަން މަންޑޭލާ ރޫލްސް” އަށް އަޙުލުވެރިކޮށް، ކޯވިޑް-19 ފަދަ ބަލިތައް ފެތުރުމުގެ ސަބަބުން ދިމާވެދާނެ މައްސަލަތަކާއި ގޮންޖެހުންތަކަށް ތައްޔާރުވެ، އެކަންކަން ޙައްލުކުރާނެ އުކުޅުތައް ދަސްކޮށްދިނުމަށް ކުރިއަށްގެންދާ ތަމްރީން ޕްރޮގްރާމެއްކަމަށެވެ. މިތަމްރީންތަކުގައި ސްރީލަންކާގެ 09 ޕްރިޒަން އޮފިސަރުންނާއި ރާއްޖޭގެ 08 ޕްރިޒަން އޮފިސަރުން ބައިވެރިވެފައިވާކަމަށް ކަރެކްޝަންސްއިން ވިދާޅުވެއެވެ.
މި ޓްރޭނިންގ ޕްރޮގްރާމް އިފްތިތާޙް ކޮށްދެއްވީ ކޮމިޝަނަރ އޮފް ޕްރިޒަންސް އަޙްމަދު މުޙައްމަދުފުޅުއެވެ. ކޮމިޝަނަރގެ އިތުރުން، ޔޫއެންއޯޑީސީގެ ފަރާތުން ސްރީލަންކާއަށް ކަނޑައަޅާފައި ހުންނަ ކަންޓްރީ ކޯޑިނޭޓަރ ދުޝާންތީ ފަރނާންޑިސް، ނެޝަނަލް ޕްރޮގްރާމް އޮފިސަރަ މުޙައްމަދު އަރުޖުން، ޕްރިޒަން އެކްސްޕަރޓް ޔޯހަން މަޓްސް ފްރެޑެރިކް ޔޮނަސަން، ޔޫއެންއޯޑީސީގެ ފަރާތުން ރާއްޖެއަށް ކަނޑައަޅާފައިވާ ޕްރިޒަން އެކްސްޕަރޓް އެލިއުދް އޮޕިލޯ އޮކެއްލޯ، ކޮމިޝަންޑް އޮފިސަރުންވަނީ މިރަސްމިއްޔާތުގައި ބައިވެރިވެވަޑައިގަންނަވާފައެވެ.
މިރަސްމިއްޔާތުގައި ވާހަކަދައްކަވަމުން ކޮމިޝަނަރ އޮފް ޕްރިޒަންސް އަޙްމަދު މުޙައްމަދުފުޅު ވިދާޅުވީ ކޯވިޑާ ގުޅިގެން ޖަލުތައް އިތުރަށް ސާފުކޮށް ޑިސްއިންފެކްޓް ކުރުމާއި ޖަލުގައި ބަންދުކޮށްފައި ތިބި ފަރާތްތަކާއި އޮފިސަރުން ކޮންމެ ދުވަހަކު ބަލީގެ ޢަލާމަތްތަކަށް ސްކްރީންކުރުމާއި، ކްލެމެންސީ އަދި ޕެރޯލްގެ ދަށުން ޝަރުޠު ހަމަވާ ފަރާތްތައް ދޫކުރުމުގެ މަސައްކަތްކޮށްފައިވާކަމަށެވެ.
މީގެއިތުރުން ދާއިމީ ބޮޑެތި ބަލިތަކަށް ބޭސްކުރާ ފަރާތްތައް ގެއަށް ވަގުތީ ގޮތުން ބަދަލުކުރުމާއި، ޖަލަށް މީހުން ވަދެ ނިކުތުން ބަންދުކުރުމާއި، ޤައިދީންނާއި ބަންދުމީހުން އެއްތަނުން އަނެއްތަނަށް ސިއްޙީ ފަރުވާ އަދި ކޯޓު ޝަރީޢަތްތަކަށް ގެންދިއުން މެދުކަނޑާލުން ފަދަ ކަންތައްތައް ހިމެނޭކަމަށް ކޮމިޝަނަރ ވިދާޅުވިއެވެ.
މި ޓްރޭނިންގ ޕްރޮގްރާމްގެ ބައިވެރިންނަށް ޑައިނަމިކް ސެކިއުރިޓީ އެޕްލިކޭޝަން، ހިއުމަން ރައިޓްސް، މަންޑޭލާ ރޫލްސް، ކޯޑް އޮފް އެތިކްސް، ކޮންޓިންޖެންސީ ޕްލޭނިންގ، ޔޫސް އޮފް ފޯސް ކޮންޓިނުއަމް، އިންސިޑަންޓް މެނޭޖްމަންޓް، ޕްރޮސީޖުރަލް ސެކިއުރިޓީ – އެސްކޯޓްސް، ކަރެކްޝަންސް ލެވެރޭޖް އޮން ޓެކްނޮލޮޖީ – ޕޯސްޓް ޕެންޑެމިކް ފަދަ މޮޑިއުލްތައް ކިޔަވާދޭނެއެވެ.