މެލޭޝިއާގައި ރާއްޖެ އިޝްތިހާރުކުރުމަށް ކެބްވެޓައިޒިން ކެމްޕެއިނެއް އެމްއެމްޕީއާރުސީން މައިބަންޕް މީޑިއާއާއެކު ފަށައިފިއެވެ.
މި ކެމްޕެއިން ކުރިއަށްދާނީ އަންނަ މަހުގެ 17 ވަނަ ދުވަހާ ހަމައަށެވެ.
މައިބަންޕް މީޑިއާއަކީ މެލޭޝިއާގައި އެންމެ ފަހުގެ ޓެކްނޮލޮޖީ ބޭނުންކޮށް އައުޓްޑޯ މީޑިއާ އެޑްވަޓައިޒިން ހިންގާ މަޝްހޫރު ކުންފުންޏެކެވެ. މި ކުންފުނިން މެލޭޝިއާގައި އާންމު ގޮތެއްގައި މިފަދަ އެޑްވަޓައިޒިން ކެމްޕެއިންތައް ކުރިއަށް ގެންދެއެވެ. އަދި މިއީ މެލޭޝިއާގައި މިފަދަ ކަންކަން ހިންގުމުގައި އެ ޤައުމުގެ ކުންފުނިތަކާއި ބޭރުގެ ކުންފުނިތަކުގެ އިތުބާރު ލިބިފައިވާ ކުންފުންޏެކެވެ.
މޯލްޑިވްސް މަރކެޓިން އެންޑް ޕަބްލިކް ރިލޭޝަންސް ކޯޕަރޭޝަން، އެމްއެމްޕީއާރުސީ އާއި މައިބަންޕްއިން ކުރިއަށްގެންދާ ކެބްވަޓައިޒިން ކެމްޕެއިންގެ ތެރެއިން ރާއްޖެއަކީ މެލޭޝިއާ ފަތުރުވެރިން ޒިޔާރަތްކުރުމަށް ރައްކާތެރި މަންޒިލެއްގެ ގޮތުގައި އިޝްތިހާރުކުރާނެއެވެ.
މި ކެމްޕެއިނަކީ ދެކުނު އިރުމަތީ އޭޝިއާގައި ރާއްޖެ ޕްރޮމޯޓްކުރުމަށް އެމްއެމްޕީއާރުސީން ގެންގުޅޭ ސްޓްރެޓަޖީގެ ދަށުން ހިންގޭ ކެމްޕެއިނެކެވެ. ދެކުނުއިރުމަތީ އޭޝިއާގެ މާކެޓުގައި ރާއްޖެ ޕްރޮމޯޓުކުރުމުގެ ސްޓްރެޓަޖީ ބިނާވެފައިވަނީ ރާއްޖޭގެ ފަތުރުވެރިކަމުގެ އެކި ކެޓަގަރީތައް މާކެޓް ކުރުމަށެވެ. މިގޮތުން ރާއްޖޭގައި މަތީ ފަންތި، އާއިލާތަކާއި މުސްލިމް، ފަތުރުވެރިންނަށް ހުރި ފުރުސަތުތަކާއި، އަންޑަރ ވޯޓަރ، ލޯކަލް އަދި ހަނީމޫން ޓޫރިޒަމް ސެގްމެންޓުގައި ރާއްޖެއިން ލިބެން ހުރި ފުރުސަތުތައް ދައްކުވައިދޭނެކަމަށް އެމްއެމްޕީއާރުސީން ހާމަކުރެއެވެ.
މި ކެބްވަޓައިޒިން ކެމްޕެއިންގެ ސަބަބުން މެލޭޝިއާގައި ރާއްޖޭގެ ބްރޭންޑު އެކްސްޕޯޝަރ އިތުރަށް ޕްރޮމޯޓުކޮށް، ރާއްޖޭގެ ފަތުރުވެރިކަމާ ގުޅުންހުރި އެންމެ ފަހުގެ މައުލޫމާތުތައް ފޯރުކޮށްދެވޭނެއެވެ. އަދި ރާއްޖޭގެ ފަތުރުވެރިކަމުގެ ހިދުމަތްދޭ ރިސޯޓު، ހޮޓެލް، ގެސްޓުހައުސް، އަދި ލިވަބޯޑުތަކުގައި ފަތުރުވެރިންނަށް ލިބެން ހުރި ފުރުސަތުތަކާއި، ތަފާތު ތަޖުރިބާތައް މާކެޓްކުރެވޭނެއެވެ.
އެމްއެމްޕީއާރުސީން ވިދާޅުވީ މި ކެމްޕެއިންގެ ދަށުން ރާއްޖޭގެ އިޝްތިހާރުތައް މެލޭޝިއާގެ ވެރިރަށް ކުއާލަލަމްޕޫރު ނުވަތަ ކޭ.އޭލްގެ މައި ސަރަހައްދުތަކުގައި ދުއްވާ 30 ޓެކްސީއެއްގައި ޖަހާނެއެވެ. އަދި މައިބަންޕްގެ ވެބްސައިޓު، ސޯޝަލް މީޑިއާތަކުގައި ރާއްޖެ އިޝްތިހާރުކުރުމުގެ އިތުރުން ބްލޮގްގައި ރާއްޖެއާ ބެހޭ އާޓިކަލް ޝާއިރުކުރާނެ ކަމަށެވެ. މީގެއިތުރުން މައިބަންޕްގެ މެމްބަރުންނަށް ރާއްޖޭގެ މައުލޫމާތު އަދި އިޝްތިހާރު މެއިލް މެދުވެރިކޮށް ފޮނުވުމުގެ އިތުރުން އެކުންފުނީގެ މެސެޖިން އެޕްގެ ޒަރިއްޔާއިން މައިބަންޕް ޑްރައިވަރުންނަށް ރާއްޖޭގެ މައުލޫމާތު ހިމެނޭ މެސެޖް ފޮނުވާނެއެވެ.
ކޯވިޑުގެ ސަބަބުން 2020 އަދި 2021ވަނަ އަހަރު މެލޭޝިއާގެ ބޯޑަރު އޮތީ ބަންދުކޮށްފައެވެ. ނަމަވެސް މިހާރު މެލޭޝިއާގެ ބޯޑަރުތައް ހުޅުވާލާފައިވާއިރު، މިއަހަރުގެ ޖެނުއަރީއިން ފެބްރުއަރީގެ ނިޔަލަށް މެލޭޝިއާއިން ރާއްޖެއަށް 1194 ފަތުރުވެރިން އައިސްފައިވެއެވެ. މި މާކެޓުގައި ރާއްޖޭގެ މަޤްބޫލުކަން ދަމަހައްޓާ އަދި ބޯޑަރު އަލުން ހުޅުވާލުމުން އެޤައުމުން ރާއްޖެއަށް އަންނަ ފަތުރުވެރިންގެ އަދަދު އިތުރުކުރުމަށް މިދިޔަ އަހަރު އެމްއެމްޕީއާރުސީން ވަނީ ގިނަ ހަރަކާތްތަކެއް ހިންގާފައެވެ.