ރަޝިޔާއިން ދެމުންދާ ޙަމަލާތައް ދިފާޢުކުރުމަށް ޔޫކްރެއިނަށް އެއް ބިލިޔަން އެމެރިކާ ޑޮލަރުގެ ހަތިޔާރު ދިނުމަށް އެމެރިކާގެ ރައީސް ޖޯ ބައިޑަން ވަޢުދުވެވަޑައިގެންފިއެވެ.
ފެބްރުއަރީ މަހުގެ 24ވަނަ ދުވަހު ރަޝިޔާއިން ޙަމަލާދޭން ފެށުމުން ޔޫކްރެއިނަށް 200 މިލިޔަން އެމެރިކާ ޑޮލަރުގެ ހަތިޔާރު ދިނުމަށް އެމެރިކާއިން ނިންމިއެވެ. ނަމަވެސް އެމެރިކާގެ ޤާނޫނުހަދާ މަޖިލީހުގެ މެންބަރުންނާ މުޙާތަބުކުރައްވައި ތަޤްރީރުކުރައްވަމުން އިތުރު އެހީތެރިކަމަކާއި އެއްބާރުލުމެއް ދިނުމަށް ޔޫކްރެއިނުގެ ރައީސް ވޮލޮދީމީރް ޒެލެންސްކީ އެދިވަޑައިގަތުމުން ބައިޑަންވަނީ އިތުރު 800 މިލިޔަން އެމެރިކާ ޑޮލަރުގެ ހަތިޔާރު ފޯރުކޮށްދެއްވުމަށް ވަޢުދުވެވަޑައިގެންފައެވެ.
ޔޫކްރެއިނުގެ ދިފާޢުއަށް އެމެރިކާއިން ފޯރުކޮށްދިނުމަށް ނިންމާފައިވާ ހަތިޔާރުތަކުގެ ތެރޭގައި މިސައިލުން ދިފާޢުވާ ނިޒާމާއި ޓޭންކަރާއި ހަނގުރާމަމަތީ މަތިންދާބޯޓާ ދެކޮޅަށް ބޭނުންކުރާ ރޮކެޓާއި މިސައިލާއި އަސްކަރީ ޑުރޯނާއި އެތައް ޓަނެއްގެ ވަޒަން ހިމެނެއެވެ. ނަމަވެސް އެމެރިކާއިން ފޯރުކޮށްދޭ ހަތިޔާރުތަކުގެ ތެރޭގައި ޒެލެންސްކީ އެދިވަޑައިގެންފައިވާ ހަނގުރާމަމަތީ މަތިންދާބޯޓުތަކެއް ނުހިމެނެއެވެ. އަދި ޔޫކްރެއިނުގައި އުދުހުން މަނާ ސަރަޙައްދެއް ޤާއިމުކުރުމަށްވެސް އެމެރިކާއިން އެއްބަސްވެފައެއް ނުވެއެވެ.
މީގެ ކުރިން ވިލާތުގެ އިއްތިޙާދުންވެސްވަނީ 500 މިލިޔަން އެމެރިކާ ޑޮލަރުގެ ހަތިޔާރު ޔޫކްރެއިނަށް ދޭން ނިންމައިފައެވެ.