ރަޝިޔާގެ ރައީސް ވުލަޑުމީރް ޕުޓިންނަކީ ހަނގުރާމައިގެ މުޖުރިމެއްކަމަށް އެމެރިކާގެ ރައީސް ޖޯ ބައިޑަން ވިދާޅުވެއްޖެއެވެ.
އެމެރިކާގެ ރިޔާސީ ގަނޑުވަރު، ވައިޓު ހައުސްގައި ބޭއްވި ބައްދަލުވުމެއްގައި ޕުޓިންނަކީ ހަނގުރާމައިގެ މުޖުރިމެއްތޯ ނޫސްވެރިޔަކު ސުވާލުކުރުމުން ބައިޑަން އެންމެ ފުރަތަމަ ވިދާޅުވީ ނޫނެކާއެވެ. ނަމަވެސް ފަހުން އޭނާވަނީ ޖަވާބު ބަދަލުކުރައްވައި ޕުޓިންނަކީ ހަނގުރާމައިގެ މުޖުރިމެއްކަމަށް ވިދާޅުވެފައެވެ. މީގެ ކުރިން އެމެރިކާގެ ސަރުކާރުންވަނީ ޕުޓިންނަކީ ހަނގުރާމައިގެ މުޖުރިމެއްކަމަށް ކަނޑައެޅުމަށް ދެކޮޅުހަދައިފައެވެ. ނަމަވެސް އެމެރިކާގެ ޤާނޫނުހަދާ މަޖިލީހުންވަނީ ޕުޓިންނަކީ ހަނގުރާމައިގެ މުޖުރިމެއްކަމަށް ކަނޑައަޅައި ޤަރާރެއް ފާސްކޮށްފައެވެ.
ރަޝިޔާގެ ރިޔާސީ ތަރުޖަމާނު ދިމިތުރީ ޕެސްކޯފު ވިދާޅުވީ ބައިޑަންގެ ވާހަކަފުޅަކީ ޤައުމެއްގެ އިސްވެރިއެއް ދައްކަވާކަހަލަ ވާހަކަފުޅެއް ނޫންކަމަށެވެ. އޭގެ އިތުރުން ބައިޑަންގެ ވާހަކަފުޅަކީ ބަލައިގަނެވޭނެ އަދި މަޢާފުކުރެވޭނެފަދަ ވާހަކަފުޅެއް ނޫންކަމަށްވެސް ޕެސްކޯފް ވިދާޅުވިއެވެ. އަދި އެމެރިކާގެ ޙަމަލާތަކުގައި ދުނިޔޭގެ އެކި ޤައުމުތަކުގެ އެތައް ހާސް ރައްޔިތުންނެއް މަރުވެފައިވަނިކޮށް ބައިޑަން އެ މޭރުމުން ވާހަކަފުޅުދެއްކެވުމަކީ ދެކޮޅުޖެހޭކަމެއް ނޫންކަމަށްވެސް އޭނާ ވިދާޅުވިއެވެ.
ޔޫކްރެއިނަށް ޙަމަލާދިނުމަށް ޢަމުރުކުރެއްވުމުން އެމެރިކާއިންވަނީ ޕުޓިންނާ ދެކޮޅަށް ދަތިކުރުމުގެ ފިޔަވަޅުތައް އަޅައިފައެވެ. އަދި ރައްދުގައި ރަޝިޔާއިންވެސްވަނީ ބައިޑަންނާ ދެކޮޅަށް އެފަދަ ފިޔަވަޅުތަކެއް އަޅައިފައެވެ.