ރަޝިޔާއިން ޔޫކްރެއިނަށް ދެމުންދާ ޙަމަލާތައް ވަޤުތުން ހުއްޓާލަން އދގެ އެންމެ މަތީ ކޯޓުން ޢަމުރުކޮށްފިއެވެ.
ނެދަލެންޑްސްގެ ދަ ހޭގުގައި ހުންނަ އިންޓަނޭޝަލް ކޯޓު އޮފް ޖަސްޓިސް، އައިސީޖޭން ޢަމުރުކޮށްފައިވަނީ ޔޫކްރެއިނަށް ދެމުންދާ ޙަމަލާތައް ވަޤުތުން ހުއްޓާލައި ރަޝިޔާގެ ފައުޖުތައް ފޭބުމަށްށެވެ. އައިސީޖޭގެ 15 ފަނޑިޔާރުންގެ ތެރެއިން 13 ފަނޑިޔާރުންގެ ތާޢީދާއެކު ނެރުނު ޢަމުރުގައި ރަޝިޔާއަށް ތާޢީދުކުރާ އެހެން ފައުޖުތަކުންވެސް ޔޫކްރެއިނަށް ޙަމަލާދިނުން ހުއްޓުވަން ޖެހޭނެކަމަށް ބުނެފައިވެއެވެ.
ޔޫކްރެއިނުން އައިސީޖޭއަށް ހުށަހެޅި މައްސަލައިގެ އަޑުއެހުމަށް ރަޝިޔާއިން ހާޒިރުވާން ދެކޮޅުހެދުމުން އެ އަޑުއެހުން ބާއްވާފައިވަނީ އެ ޤައުމުގެ އެއްވެސް ބައިވެރިވުމެއް ނެތިއެވެ. ޔޫކްރެއިނުގެ ވަކީލުންވަނީ ރަޝިޔާއިން އިޚްތިޔާރުކުރީ ކޯޓުން މައްސަލަ ނިންމުމުގެ ބަދަލުގައި ހަނގުރާމައިގެ މައިދާންކަމަށް ބުނެ ވަރަށް ބޮޑަށް ފާޑުކިޔައިފައެވެ. އައިސީޖޭގެ ޢަމުރަށް ރަޝިޔާއިން ޢަމަލުނުކުރި ނަމަވެސް އެ ޢަމުރު ތަންފީޒުކުރެވޭނެ ގޮތެއް ނޯވެއެވެ. އަދި އައިސީޖޭގެ ޢަމުރަކަށް ޢަމަލުނުކުރުމަކީ ޤައުމުތަކުން ޢާއްމުކޮށް ކުރާކަމެއްވެސް ނޫނެވެ.
ދަ ހޭގުގައި ހުންނަ ބައިނަލްއަޤްވާމީ ޖިނާޢީ ކޯޓު، އައިސީސީންވެސްވަނީ ޔޫކްރެއިނަށް ޙަމަލާދިނުމަށް ޕުޓިން ޢަމުރުކުރެއްވުމުން އޭނާގެ މައްސަލައެއް ތަޙްޤީޤުކުރަމުންދާކަމަށް ބުނެފައެވެ.