ރަޝިޔާއިން ދެމުންދާ ޙަމަލާތައް ދިގުލައިގެން ގޮސްފިނަމަ ޔޫކްރެއިނުގެ އާބާދީގެ %90 މީހުން ފަޤީރުކަމާ ކުރިމަތިލާން ޖެހިދާނެކަމުގެ ބިރު ބޮޑުކަމަށް އދގެ ތަރައްޤީއާބެހޭ އިދާރާ، ޔޫއެންޑީޕީން ބުނެފިއެވެ.
ޔޫއެންޑީޕީން ބުނެފައިވަނީ ޔޫކްރެއިނުގެ ސަރުކާރަށް ބޭނުންވާ އެއްބާރުލުން ފޯރުކޮށްދިނުމަށް އެ އިދާރާއިން މަސައްކަތްކުރަމުންދާކަމަށާއި ޔޫކްރެއިނުގެ އިޤްތިޞާދު އަނދަވަޅަކަށް ވެއްޓުނަނުދިނުމަށް އެހީތެރިވަމުންދާކަމަށެވެ. އަދި ޙާލުގައި ޖެހިފައިވާ ޢާއްމުންނަށް ބޭނުންވާ މާލީ އެހީތެރިކަމާއި ޒަރޫރީ ސާމާނު ފޯރުކޮށްދިނުމަށް ގިނަ މަސައްކަތްތަކެއް ކުރަމުންދާކަމަށްވެސް އެ އިދާރާއިންވަނީ ބުނެފައެވެ. ނަމަވެސް ހަނގުރާމަ ދިގުލައިގެން ގޮސްފިނަމަ ޔޫކްރެއިނުގައި ފަޤީރުކަން ފެތުރި އެ ކަމުގެ އަސަރު އެ ޤައުމުގެ ކޮންމެ 10 މީހަކުން 9 މީހަކަށް ކުރާނެކަމަށް ޔޫއެންޑީޕީންވަނީ ލަފާކޮށްފައެވެ. ރަޝިޔާއިން ޙަމަލާދިނުމުގެ ކުރިން ޔޫކްރެއިނުގެ ފަޤީރުންގެ ނިޞްބަތަކީ %2އެވެ.
ޔޫކްރެއިނުގެ އިޤްތިޞާދީ މުޝީރު އޯލޭގު އުސްތެންކޯ ވިދާޅުވެފައިވާ ގޮތުގައި ފާއިތުވި ތިން ހަފުތާގެ ތެރޭގައި އެ ޤައުމަށްވަނީ 100 ބިލިޔަން އެމެރިކާ ޑޮލަރުގެ ގެއްލުމަކާ ކުރިމަތިލާން ޖެހިފައެވެ. އަދި އެ ޤައުމުން %50 ވިޔަފާރިތައް ހުއްޓުމަކަށް އައިސްފައިވާކަމަށްވެސް އޭނާވަނީ ވިދާޅުވެފައެވެ. އޭގެ އިތުރުން އެ ޤައުމުގެ 3 މިލިޔަން މީހުންގެ ގެދޮރުގެއްލިފައިވާކަމަށްވެސް އޭނާވަނީ ފާހަގަކުރައްވައިފައެވެ.