ވިލާތުގެ ތިން ޤައުމެއްގެ ބޮޑުވަޒީރުން ޔޫކްރެއިނުގައި އެންމެ ވަރުގަދައަށް ހަނގުރާމަކުރަމުންދާ ވެރިރަށް ކިޔޭވަށް ވަޑައިގެންފިއެވެ.
ޕޯލޭންޑާއި ޗެކް ރިޕަބްލިކާއި ސުލޮވޭނިޔާގެ ބޮޑުވަޒީރުން ކިޔޭވަށް ވަޑައިގެންފައިވަނީ ޕޯލޭންޑުގެ ސަރަޙައްދީ ރޮނގު ހުރަސްކޮށް ރޭލެއްގައެވެ. ދިގު އަދި ނުރައްކާތެރި ދަތުރުފުޅެއް ކުރެއްވުމަށްފަހު އެ ތިން ބޭފުޅުންވަނީ ކިޔޭވަށް ވަޑައިގެން ޔޫކްރެއިނުގެ ރައީސް ވޮލޮދީމީރް ޒެލެންސްކީއާއި ސަރުކާރުގެ އިސްވެރިންނާ ބައްދަލުކުރައްވައި ހިތްވަރުދެއްވައިފައެވެ. އެއީ ފެބްރުއަރީ މަހުގެ 24ވަނަ ދުވަހު ރަޝިޔާއިން ވަރުގަދަ ޙަމަލާތަކެއް ދޭން ފެށިފަހުން ޔޫކްރެއިނަށް ވަޑައިގެންނެވި އެންމެ މަތީފަންތީގެ ބޭފުޅުންނެވެ. އެ ބޭފުޅުންވަނީ ޒެލެންސްކީއާ ބައްދަލުކުރައްވައި ރަޝިޔާގެ ޙަމަލާތަކުން ޔޫކްރެއިނު ދިފާޢުކުރުން މުޙިއްމުކަމަށާއި އެ ޤައުމު ގެއްލިއްޖެނަމަ ވިލާތަށް ފޫނުބެއްދޭނެވަރުގެ ގެއްލުމަކާ ކުރިމަތިލާން ޖެހޭނެކަމަށް ވިދާޅުވެފައެވެ.
ރަޝިޔާގެ ފައުޖުތަކުން ކިޔޭވު ވަށާލާފައިވާ ދަނޑިވަޅެއްގައި އެ ތިން ބޭފުޅުން އެ ރަށަށް ވަޑައިގެން ޒެލެންސްކީއާ ބައްދަލުކުރެއްވި ވަޤުތުވެސް ރަޝިޔާއިން ދިޔައީ ވަރުގަދަ ޙަމަލާތަކެއް ދެމުންނެވެ. އަދި ބައެއް ވަޤުތުތަކުގައި ގޮވުންތަކުގެ އަޑު ބާރުގަދަވުމުން އެ ބޭފުޅުންނާ ވާހަކަދެއްކުމަށްވެސް އުނދަގޫފުޅުވިއެވެ.
ވިލާތުގެ އިއްތިޙާދުން ބުނެފައިވަނީ ޕޯލޭންޑާއި ޗެކް ރިޕަބްލިކާއި ސުލޮވޭނިޔާގެ ބޮޑުވަޒީރުން ޔޫކްރެއިނަށް ވަޑައިގެންނެނީ އެ އިއްތިޙާދު ތަމުޞީލުކުރަން ނޫންކަމަށެވެ. ނަމަވެސް އެ ބޭފުޅުންގެ ދަތުރުފުޅުގެ މަޢުލޫމާތުތައް ޙިއްޞާކުރެއްވިކަމަށް އެ އިއްތިޙާދުން ބުނެފައިވެއެވެ.
ޕޯލޭންޑާއި ޗެކް ރިޕަބްލިކާއި ސުލޮވޭނިޔާއަކީ ވިލާތުގެ އިއްތިޙާދުގެ އިތުރުން ހުޅަނގުގެ އަސްކަރީ އިއްތިޙާދު، ނޭޓޯގެ މެންބަރުކަންވެސް އޮންނަ ތިން ޤައުމެވެ.