ހުޅަނގުގެ އަސްކަރީ އިއްތިޙާދު، ނޭޓޯއިން އެއްވެސް ޖާގައެއް އަދި ރައްކާތެރިކަމެއް ނުދޭނެކަން މިހާރު އެނގިއްޖެކަމަށް ޔޫކްރެއިނުގެ ރައީސް ވޮލޮދީމީރް ޒެލެންސްކީ ވިދާޅުވެއްޖެއެވެ.
އިނގިރޭސިވިލާތުގެ ބޮޑުވަޒީރު ބޮރިސް ޖޮންސަން ބޭއްވެވި ވީޑިޔޯ ބައްދަލުވުމެއްގައި ވާހަކަދައްކަވަމުން ޒެލެންސްކީ ވިދާޅުވީ އެތައް އަހަރެއްވަންދެން ނޭޓޯގެ މެންބަރުކަން ލިބޭނެކަމުގެ ހުވަފެންތަކެއް ޔޫކްރެއިނަށް ދެއްކިކަމަށާއި އެ އިއްތިޙާދުގެ މެންބަރުކަން ލިބޭނެކަމަށް އެ ޤައުމުން އުއްމީދުކުރިކަމަށެވެ. ނަމަވެސް ނޭޓޯއިން އެއްވެސް ޖާގައެއް ނުލިބޭނެކަން މިހާރު އެނގިއްޖެކަމަށާއި ޔޫކްރެއިނުން މިހާރު މަސައްކަތްކުރަނީ ވަކިވަކި ޤައުމުތަކުން ޙިމާޔަތާއި ރައްކާތެރިކަން ހޯދުމަށްކަމަށްވެސް ޒެލެންސްކީ ވިދާޅުވިއެވެ. އަދި ޔޫކްރެއިނަށް އަޅާލައި ޤައުމުތައް މިހާރު ސާފުވެއްޖެކަމަށާއި ނޭޓޯއިން ލިބޭނެ ސަލާމަތާއި ރައްކާތެރިކަމެއް ނެތްކަންވެސް އެނގިއްޖެކަމަށްވެސް އޭނާ ވިދާޅުވިއެވެ.
އިނގިރޭސިވިލާތުގެ އެކްސްޕެޑިޝަނަރީ ފޯސަސްވެސް ބައިވެރިވި ބައްދަލުވުމުގައި ޔޫކްރެއިނުގައި އުދުހުން މަނާ ސަރަޙައްދެއް ޤާއިމުކުރުމަށް ނޭޓޯއިން ތަކުރާރުކޮށް ދެކޮޅުހަދަމުންދާތީ ޒެލެންސްކީވަނީ އެ އިއްތިޙާދަށް ވަރަށް ބޮޑަށް ފާޑުވިދާޅުވެފައެވެ. 2019ވަނަ އަހަރުގެ ތެރޭގައި ޔޫކްރެއިނުގެ ޤާނޫނުއަސާސީގައި ނޭޓޯގެ މެންބަރުކަން ހޯދުމަށް މަސައްކަތްކުރުމަށްވަނީ ހިމަނައިފައެވެ. ނަމަވެސް ނޭޓޯގެ އަދި ވިލާތުގެ އިއްތިޙާދުގެ މެންބަރުކަމެއްވެސް ޔޫކްރެއިނަށް ލިބިފައެއް ނުވެއެވެ.